Според верувањето, допирањето на меѓуножјето на неговата скулптура носи плодност.

Животната приказна на Виктор, неговата трагична смрт и бронзената скулптура што го прикажува во моментот на смртта го направија еден од најнеобичните „станари“ на овие гробишта.

Виктор Ноар (1848–1870) бил перспективен француски новинар познат по својот храбар политички ангажман. Убиен е во двобој со принцот Пјер Бонапарта, што во тогашна Франција предизвикало огромен скандал и поттикнало бран народно незадоволство. Неговиот погреб се претворил во масовни протести, а Ноар брзо станал симбол на борбата против политичката репресија.

На неговиот гроб е поставена бронзена скулптура која го прикажува телото на Ноар непосредно по смртта. Фигурата повеќе од еден век привлекува внимание на посетителите.

Сепак, еден детаљ од скулптурата станал централна точка на една необична легенда: изразениот релјеф на меѓуножјето кој со текот на времето стекнал речиси митски статус.

Легендата за плодноста

Според популарното верување меѓу парижаните и туристите – допирањето на меѓуножјето на скулптурата носи плодност, оставањето цвеќе во шеширот привлекува вистинска љубов, додека бакнеж на усните на бронзениот Виктор Ноар носи брак или среќа во љубовта.

Поради тоа, токму тие делови од статуата станале значително посветли од остатокот од бронзата – резултат на илјадници допири и ритуали што ги изведуваат посетителите во надеж дека Ноар ќе ги „благослови“ во нивниот емотивен живот.

Многумина од нив се однесувале прилично несоодветно, па управата на гробиштата „Père-Lachaise“ во еден период поставила ограда околу скулптурата, сметајќи дека посетителите претеруваат и го оштетуваат споменикот.

Сепак, по бурните реакции на јавноста – и на туристите кои сметале дека им се одзема дел од културната традиција – оградата била отстранета, а легендата продолжила да се шири непречено.