Американски генерал призна дека користи „ChatGPT“ за донесување клучни командни одлуки

Генерал-мајор Вилијам „Хенк“ Тејлор, командант на Осмата армија, им рече на новинарите на конференцијата на Асоцијацијата на армијата на Соединетите Американски Држави во Вашингтон дека го користи „ChatGPT“ за да го подобри начинот на донесување одлуки што влијаат врз илјадници војници.

„ChatGPT и јас се зближивме многу во последно време“, рече Тејлор за време на тркалезната маса за медиумите во понеделник, иако се воздржа од давање примери за лична употреба.

Неговите забелешки за „ChatGPT“, кој беше развиен од „OpenAI“, беа објавени од „Business Insider“.

„Сакам да градам, се обидувам да изградам модели што ќе нѝ помогнат на сите“, рекол Тејлор тогаш.

Тој додал дека истражува како вештачката интелигенција би можела да ги поддржи неговите процеси на донесување одлуки – не во борбени ситуации, туку во управувањето со секојдневните лидерски задачи.

„Како командант, сакам да донесувам подобри одлуки. Сакам да бидам сигурен дека донесувам одлуки во вистинско време за да имам предност“, објаснил тој.

Тејлор, кој е и началник на Генералштабот на Командата на Обединетите нации во Јужна Кореја, рекол дека ја гледа технологијата како потенцијална алатка за градење аналитички модели и обука на неговиот персонал за поефиасно размислување.

Коментарите означуваат едно од најдиректните признанија досега од страна на висок американски воен службеник за користење на комерцијален чет-бот за помош во лидерството или оперативното размислување.

Американската војска се стреми да ја интегрира вештачката интелигенција во своите операции на сите нивоа – од логистика и надзор до тактики на бојното поле – додека ривалските нации како Кина и Русија се обидуваат да го сторат истото.

Службениците велат дека системите управувани од вештачка интелигенција би можеле да овозможат побрза обработка на податоци и попрецизно таргетирање, иако тие исто така изразија загриженост за сигурноста и одговорноста кога софтверот презема улоги традиционално резервирани за човечка процена.

Пентагон изјави дека идните конфликти би можеле да се одвиваат со „брзина на машина“, барајќи одлуки во дел од секундата што ги надминуваат човечките способности.

Поранешниот секретар на воздухопловните сили, Френк Кендал, минатата година предупреди дека брзиот напредок на автономното оружје значи дека „времето на одговор за постигнување ефекти е многу кратко“ и дека командантите кои не успеваат да се приспособат „нема да го преживеат следното бојно поле“.

Вештачката интелигенција веќе е тестирана во борбени симулации, вклучително и експеримент на Агенцијата за напредни истражувачки проекти на воздухопловните сили и одбраната во кој алгоритмот пилотираше модифициран Ф-16 за време на симулирана воздушна борба.

Други програми се користат за филтрирање на сателитски податоци, следење на логистиката и поедноставување на административната документација за единиците на терен.

Силите за специјални операции на армијата усвоија слични алатки за да го намалат она што го нарекуваат „когнитивен товар“ врз операторите – користејќи вештачка интелигенција за изработка на извештаи, обработка на податоци од мисијата и анализа на разузнавачки информации во голем обем.

Истовремено, претставници на Пентагон повикуваат на претпазливост.

Одбранбените лидери предупредија дека користењето на системите со вештачка интелигенција може да доведе до протекување на чувствителни информации или да произведат погрешни заклучоци ако податоците се нецелосни или манипулирани.

Тејлор признал дека еден од предизвиците за користење на најсовремена технологија е одржувањето чекор со брзиот развој на алатките за вештачка интелигенција – вклучително и обезбедувањето дека тие ги исполнуваат строгите безбедносни барања на војската.

„ChatGPT“ привлече глобално внимание бидејќи владите и компаниите брзаат да ги разберат неговите ветувања и недостатоци.

Иако поновите верзии на програмата се способни за сложени заклучоци и анализи, се покажаа дека тие исто така произведуваат грешки и измислици.