Додека дел од нејзините следбеници ја бранат со зборовите дека „купила она што најмногу им се допаѓа на децата“, други остро реагираат дека ваквата исхрана може сериозно да им наштети на долг рок.
Интернетот деновиве го преплави видео во кое една Американка покажува што купила во маркет за своето семејство – потрошила дури 500 долари (околу 428 евра). Но наместо восхит за количината, видеото предизвика лавина критики – корисниците беа згрозени бидејќи речиси немаше свежо овошје, зеленчук или месо.
Во хартиените кеси доминираа индустриски производи: пакети тост, пуканки, колачиња, чипс, сокови, пилешки медалјони, стапчиња од моцарела, неколку пакувања помфрит и дури 37 замрзнати пици. Единствената „посвежа“ намирница беше лубеница – што дополнително ги налути гледачите.
„Како воопшто функционираат вака? Ова е 99% преработена храна. Децата ќе вечераат житарици и пица секој ден“, напиша еден корисник. Друг додаде: „37 пици? Тоа е повеќе од што просечен човек јаде за цела година!“.
Видеото го сними 37-годишна мајка на три сина, која на „TikTok“ објавува под името@boymomx3_b. Нејзиниот профил прикажува семејни моменти, грижа за децата и кратки сцени од секојдневието. Ја следат повеќе од 42 илјади луѓе, а некои од нејзините видеа имаат и над пет милиони прегледи.
Сепак, токму снимките од купување храна предизвикаа најмногу внимание. Додека едни ја оправдуваат со аргументот дека „купува што децата сакаат“, други предупредуваат дека такви навики можат сериозно да ја загрозат здравствената состојба на малолетниците.
Широка дебата за исхраната во САД
Оваа полемика уште еднаш го отвори прашањето за навиките во исхраната во САД. Податоците покажуваат дека повеќе од 50% од калориите што ги внесуваат Американците доаѓаат од ултрапроцесирана храна – газирани пијалаци, грицки, готови јадења и слатки. Токму децата и тинејџерите се најголеми потрошувачи.
Од друга страна, истражувањата на „Pew Research Center“ откриваат дека повеќето Американци сепак готват дома барем неколку пати неделно. Регионалните кујни – како кајунската, тексашката или калифорниската – сè уште имаат важна улога, а трендовите за здрава исхрана и органски производи бележат пораст.
Сепак, достапноста на "fast food"-ланците и високите цени на свежите производи во многу региони ја прават брзата храна полесен и попрактичен избор за бројни семејства.
