Шпанија против наемот на станови за туристи: Нареди отстранување на речиси 66.000 огласи на „Airbnb“

Точка

21/05/2025

10:42

1.596

Големина на фонт

а а а

Шпанската влада побара отстранување на огласи за речиси 66.000 недвижности на платформата за изнајмување „Airbnb“, поради кршење на прописите за туристичко сместување.

Овие мерки на претпазливост доаѓаат во време кога започнаа протестите против прекумерниот туризам пред летната сезона, а само на Канарските Острови илјадници луѓе учествуваа на протестите во недела.

Министерот за социјални права, потрошувачки прашања и „Агенда 2030“, Пабло Бустиндуј, рече дека предметните недвижнини за изнајмување „прекршуваат различни норми во врска со домувањето за туристичка употреба“.


Соопштението уследи по пресудата на судот во Мадрид според која „Airbnb“ мора веднаш да повлече од пазарот 4.984 недвижности наведени од министерството. Имотите се наоѓаат во шест региони: Мадрид, Андалузија, Каталонија, Валенсија, Баскија и Балеарските Острови.

Министерството сега чека понатамошни судски одлуки за другите 60.000 имоти чиешто објавување на листата го смета за незаконско. Според министерството, имотите што ги идентификувале или немале број на дозвола, или имале погрешен број, или не го навеле правниот статус на сопственикот кој треба да покаже дали изнајмува на професионална основа или како приватно лице.

Бастиндуј ја опиша одлуката на судот како „јасна победа за оние кои се борат за заштита на правото на домување“. Тој додаде дека „ниеден економски интерес нема приоритет над домувањето и дека ниедна компанија, без разлика колку е голема или моќна, не е над законот“.

Шпанија е втора најпопуларна туристичка дестинација во светот

Проблемот со домувањето се појави како најголема загриженост на Шпанците во последните месеци, поради зголемените трошоци за изнајмување, особено во поголемите градови. Цените за наем се дуплирааа во последната деценија, додека платите не успеаја да го следат темпото. Многумина ги идентификуваа туристичките апартмани како главна причина за проблемот, лишувајќи го локалното население од сместување.


Инаку Шпанија е втора најпопуларна туристичка дестинација во светот, по Франција, со 94 милиони странски посетители во 2024 година, што е зголемување од 13 проценти во споредба со претходната година.

Социјалистичкиот премиер Педро Санчез претходно оваа година изјави дека „има премногу Airbnb станови, а премалку домови“ и вети дека ќе го спречи „неконтролирано“ ширење на недвижностите во туризмот.


Некои локални власти, исто така, почнаа да дејствуваат против „Airbnb“. Градското собрание на Барселона објави дека ќе укине 10.000 краткорочни туристички апартмани до крајот на 2028 година. Други зазедоа поинаков пристап. Во последните месеци, „Airbnb“ постигна договори со локалните власти на Канарските Острови, Ибица и Мурсија за да се осигури дека сопствениците на имотите ги почитуваат правилата за туристичко изнајмување.

„Airbnb“ одговори на судската одлука инсистирајќи дека ќе поднесе жалба на одлуките поврзани со овој случај и рече дека не биле поднесени докази за прекршување на правилата од страна на домаќините. Исто така, се повика на пресудата на Врховниот суд на Шпанија од 2022 година, во која е утврдено дека одговорноста за објавување информации е на сопственикот на секој имот, а не на компанијата, која е „неутрален посредник“, а не давател на услуги за недвижности.

Компанијата, исто така, изнесе поширока објаснување за проблемот со домувањето во Шпанија.


„Основната причина за кризата со прифатливо домување во Шпанија е недостатокот на понуда за задоволување на побарувачката“, рече портпаролот. „Владите ширум светот гледаат дека регулирањето на Airbnb не ги ублажува проблемите со домувањето ниту ги враќа домовите на пазарот – тоа само им штети на локалните семејства кои се потпираат на угостителството за да се справат со растечките трошоци“, додаде тој.

Минатото лето, Шпанија доживеа бран протести против прекумерниот туризам на многу популарни дестинации, а неговото влијание врз домувањето беше најголемата поплака.



Со оглед на тоа што бројот на странски посетители во Шпанија брзо се приближува до 100 милиони годишно, се очекува немирите да продолжат и ова лето. Во неделата, неколку илјади луѓе излегоа на улиците низ Канарските Острови под слоганот „Канарските Острови имаат граница“.