Годинашниот Кански филмски фестивал дефинитивно се разликува од претходните поради новите модни правила кои беа воведени во последен момент. Сепак, тоа што беше забранета голотијата, не значеше дека ќе недостасуваат шокантни изданија.
Имено, моделот Мичел Акат беше закопчана до грло, но имаше глава од леопард на градите, во согласност со кодексот на облекување – од глава до пети.
Нескротлив гламур и „мачкина“ грациозност – вака модните познавачи го опишаа стајлингот што го носеше Мичел Акат, модел од Јужен Судан, која се појави на црвениот тепих на престижниот настан.
Од друга страна, оние што се собраа на Азурниот Брег за да уживаат во најновите достигнувања на „седмата уметност“ и парадата на филмските ѕвезди се прашуваа дали Канскиот фестивал полека се претвора во фрик-шоу.
По забранувањето на оскудните креации што откриваат повеќе отколку што покриваат, а кои сега се забранети, како и преголемите фустани со долги „репови“ што зафаќаат премногу простор, некои гости решија да ја изразат својата склоност кон екстраваганција на поинаков начин, токму како што тоа го направи Мичел.
Иако Хали Бери одлучи да го промени својот стајлинг во последен момент, некои познати модели, кои се традиционален „украс“ на овој спектакуларен настан, го игнорираа новото правило, решени малку да си поиграат со дрес кодот. За среќа, иако беше напомнато дека оние кои нема да ги почитуваат правилата ќе бидат санкционирани, ним им беше „прогледано низ прсти“.
