Мал кујнски „земјотрес“ ѝ се случи на една дама по име Мирјана, која ги насмеа своите пријатели на Фејсбук објавувајќи необична содржина. Имено нејзиното тивко попладне и подготовката на ручекот биле прекинати од експлозија. Нејзиниот експрес лонец буквално експлодирал, а она што сега виси од таванот не е уметничка инсталација, туку боранија залепена на таванот како потсетник на инцидентот.

Како воопшто експлодира експрес лонец? Освен ако тајно не сте се обидувале да лансирате зеленчук во орбитата, причината лежи во неколку пропусти што можат да нѝ се случат на сите. Експрес-лонецот работи под притисок, што значи дека водата и пареата во него достигнуваат температури и притисоци многу повисоки од обичното готвење. Ако вентилот за ослободување на пареа се блокира со боранијата, крпа или можеби некоја „лоша среќа“, притисокот нема да може да излезе. Значи, притисокот се зголемува и се зголемува сè додека не експлодира.

Друго сценарио: капакот не е правилно затворен, гумениот дихтунг-заптивка е стар и сув, или едноставно, садот е полн до врв, па нема простор пареата правилно да се распредели. Сето тоа се сведува на идеален коктел за експлозија – само што, наместо огномет, добивате боранија на плафон и оштетен кујнски ѕид – или таван.

И додека многумина од нас мислат дека експрес-лонецот е револуционерен изум што заштедува време и трпение, боранијата на Мирјана од таванот нè потсетува дека технологијата исто така сака внимание и трпение. Па, следниот пат кога ќе ставите грашок или боранија во вашиот експрес лонец, проверете го вентилот, дихтунгот и количината, бидејќи сигурно не сакате вашата кујна да изгледа како онаа на Мирјана.

Што да направите за ручекот да не ви заврши на таван?

Редовно чистете го вентилот – и по секое готвење, без исклучок.

Проверете го дихтунгот – ако е сув и испукан време е за нов.

Не преполнувајте – следете ги ознаките во садот, тие не се таму за да ве плашат.

Почитувајте го времето – оставете го садот да се олади сам од себе или правилно користете го копчето за испуштање пареа.