Двојката беше во брак од 1991 година. Иако почнале да се гледаат во средината на 1980-тите, Хекман јасно ставил до знаење дека не ја оставил својата прва сопруга Феј Малтезе, со која беше во брак од 1956 до 1986 година, поради Аракава, туку дека тие претходно се разделиле.

Зборувајќи за сличностите со неговиот лик Хари Мекензи од филмот „Twice in a Lifetime“ од 1985 година, Хекман рекол: „Не ја оставив мојата сопруга поради помлада жена. Едноставно се оддалечивме. Кога работите во оваа индустрија, бракот бара многу труд и љубов“.

Живот далеку од Холивуд

Во 1990 година, Хекман и Аракава почнале да живеат заедно во Санта Фе. Истата година, славниот актер беше подложен на ангиопластика поради конгестивна срцева слабост, поради што, меѓу другото, подоцна одлучил да се повлече од светот на филмот.

„Не одржав прес-конференција за да го објавам моето пензионирање, но да, веќе нема да глумам“, изјавил тој за Ројтерс во 2008 година. „Едноставно не сакам повеќе да го правам тоа“, додал тој.

Хекман ја пренасочил својата креативна енергија кон пишување, објавувајќи го својот прв роман, „Wake of the Perdido Star“ во 1999 година. Оттогаш напишал уште најмалку четири книги, вклучувајќи го и „Payback at Morning Peak“, вестерн инспириран од неговиот живот во Санта Фе. Во интервју во 2014 година за поткастот „Writer’s Bone“, Хекман признал дека неговата сопруга му помогнала да го усоврши својот стил на пишување. „Ако воопшто имам некој стил, тоа е резултат на уредување, предлози од пријателите и нејзините прецизни, немилосрдни рецензии“, рекол тој.

Која е Бетси Аракава?

Хекмен ја запознал својата сопруга во теретана во Калифорнија, каде Аракава работела хонорарно. Таа е родена во Хаваи во раните 1960-ти, и иако таа и Хекман немале заеднички деца, таа се грижела за неговиот син Кристофер Ален и ќерките Лесли Ен и Елизабет Џин, кои актерот ги добил од првиот брак со Феј Малтезе.

Хекман во интервју за „Irish Independent“ во 2000 година признал дека неговиот успех влијаел на неговиот однос со децата: „Тешко е да се биде дете на славна личност. Не можев секогаш да бидам дома кога тие растеа, а живеењето во Калифорнија значеше дека тие секогаш ја чувствуваа тежината на мојот успех“. Освен што работела во фитнес-центар, Аракава била и талентирана пијанистка, пренесе Њујорк пост.

Дом од соништата во Санта Фе

Нивниот дом во Санта Фе бил прикажан во „Architectural Digest“ во април 1990 година. Иако куќата првично била во лоша состојба, парот ја трансформирал во светол и воздушен простор со отворен план и комбинација од пуебло и колонијални стилови на Ново Мексико и шпански барок.

Хекман бил вклучен во секој детаљ од дизајнот, одредувајќи го распоредот на собите и избирајќи ги боите и материјалите, но Аракава одиграла клучна улога во реализацијата на неговите идеи, особено кога Хекман бил отсутен поради снимања. Таа потоа ја презела иницијативата така што телефонски се консултирала со него и му испраќала фотографии од напредокот на работата.

Двојката многу ги сакала животните. Додека Хекмен го снимал филмот „The Replacements“ во Балтимор, две кучиња скитници дошле на сетот. Тие биле однесени во локално засолниште, каде што ги добиле имињата Џин и Киану, по Хекман и неговиот колега Киану Ривс, а Хекман и Аракава решиле да посвојат куче кое го добило неговото име.

Хекман ретко зборувал за својот приватен живот, но во интервју за „Empire“ во 2020 година, тој открил како тој и сопругата уживале во едноставни активности. Редовно гледале филмови и секој петок излегувале заедно.

Нема сомнежи за казнено дело

Посетуваме, полицијата во округот Санта Фе во средата попладне ги открила телата на двократниот оскаровец (95), 63-годишната Бетси и нивното куче.

Нема сомнеж за казнено дело, а причината за смртта не е објавена. Шерифот на округот Санта Фе Адан Мендоза денеска ја потврди веста за нивната смрт.