Гледачите ја имаа можноста да ја гледаат втората сезона од хит серијата „Squid Games“ од 26 декември минатата година, а сега Нетфликс официјално откри дека фановите нема да мораат долго да чекаат за третата и последна сезона. Во објава на социјалните мрежи, Нетфликс сподели дека третата сезона ќе има премиера на 27-ми јуни.

Оваа информација веќе случајно беше протечена на почетокот на оваа година, кога Netflix Korea накратко објави видео на својата веб-страница во кое не беше вклучена само годината на објавување, туку и датумот. Сега, откако сè е официјално објавено на главните канали на социјални мрежи на Нетфликс, гледачите не можат да ја сокријат возбудата што толку брзо ќе ја гледаат третата сезона, особено ако се земе предвид дека имаше три години разлика помеѓу првата и втората сезона.

Речиси ништо не е откриено за заплетот на претстојната сезона, но се претпоставува дека тоа ќе ги следи настаните веднаш по завршувањето на седмата епизода од втората сезона на серијата. Во третата сезона ќе глумат Ли Јунг-џае, Парк Ѓу-Јанг, Џо Ју-ри, Канг Ае-сим, Џанг Донг-геун, Ли Бјунг-Хун и други актери.

Покрај официјалниот датум на премиера, Нетфликс ги објави и првите фотографии од третата сезона на серијата.

Гледачите едвај ја чекаат новата сезона

Многумина фанови на серијата беа воодушевени од веста дека ќе можат да го погледнат продолжението на серијата, која заврши во напната втора сезона, многу порано отколку што очекуваа. Тие ги споделија своите мислења во коментарите под објавата на Фејсбук на Нетфликс. Некои од нив напишаа дека им е жал што и третата сезона ќе биде последна, бидејќи ова е серија која секогаш можат да ја гледаат.

„Само неколку месеци од втората сезона до третата сезона. Ви благодариме, Нетфликс!“, „Ова е една од оние серии што не можев да престанам да ги гледам. Тажен сум што завршува со трета сезона“, „Нетфликс реши да не почести денес“, „После таков крај, уште подобро е да не чекаме долго за новата сезона“, „Уште неколку месеци и потоа почнува вистинската игра“, „Едвај чекам беа одлични, не се сомневам дека така ќе биде и со трето“, се само дел од многуте коментари на фановите на „Squid Game“.

Иако официјално е трета сезона, креаторот на популарната серија Хванг Донг-хјук претходно изјави дека продолжението на серијата повеќе ќе личи на вториот дел од втората сезона.

„Нема посебна причина освен што првично ја замислував како една серија, така што втората и третата сезона беа дел од една приказна додека ја пишував. Меѓутоа, како што ја развивав приказната, сфатив дека има премногу епизоди и тоа беше предолго затоа што „Можете да го видите патувањето на Ги-Хун - од враќање во играта до бунт, што всушност е кулминација на приказната, каде што тој се обидува да подигне востание, но на крајот сето тоа не успева“, објасни Хванг Донг-Хјук во тоа време.

Втората сезона, исто како и првата, беше многу успешна за Нетфликс, а за само единаесет дена од нејзината премиера, на 26 декември, серијата беше прегледана 126 милиони пати.