Холестеролот е масна супстанција присутна во крвта и клетките и постои во две форми - HDL (липопротеини со висока густина), познат како „добар“ холестерол, кој помага да се отстрани вишокот холестерол од крвотокот и го намалува ризикот од срцеви заболувања, и LDL (липопротеини со мала густина), познат како „лош“ холестерол, кој може да се депонира на ѕидовите на артериите, создавајќи плак кој го зголемува ризикот од срцеви и мозочни удари.

Тестостеронот може да влијае на нивото на двата вида холестерол, но ова влијание зависи и од генетиката, животните навики и општото здравје. Во некои случаи, може да го зголеми нивото на ЛДЛ холестерол, што може да доведе до атеросклероза или таложење на наслаги во артериите, зголемувајќи го ризикот од срцев и мозочен удар, објаснува д-р Манџу Гупта.

Истражувањата покажуваат дека ниското ниво на тестостерон може да го зголеми ризикот од кардиоваскуларни болести, додека терапијата за замена на тестостерон може да ја намали оваа веројатност. Исто така, студија од 2023 година сугерира дека терапијата со тестостерон може да придонесе за намалување на телесните масти, зголемување на мускулната маса, подобрување на густината на коските и намалување на вкупниот холестерол.

Како тестостеронот влијае на здравјето на срцето?

Кај мажите, нивото на тестостерон природно се намалува по 40-тата година, што е поврзано со зголемен ризик од срцеви заболувања, метаболички синдром и дијабетес тип 2. Студија од 2017 година сугерира дека ниското ниво на тестостерон може да придонесе за развој на коронарна срцева болест.

„Тестостеронот може да ја промени рамнотежата помеѓу добриот и лошиот холестерол, па затоа е важно редовно да се следи неговото ниво, особено кај луѓето на хормонска терапија или кај оние со семејна историја на срцеви заболувања“, нагласува д-р Гупта.

Како да се намали негативното влијание?

Со правилна исхрана и здрав начин на живот, можно е да се контролира нивото на холестерол и да се намали неговата поврзаност со тестостеронот. Еве неколку клучни совети од експерти:

• Правилна исхрана - Јадете повеќе овошје, зеленчук, цели зрна и здрави масти. Избегнувајте заситени масти и шеќери, бидејќи го зголемуваат нивото на холестерол.

• Физичка активност – Редовното вежбање, брзото одење или пливањето го регулираат нивото на холестерол преку зголемување на HDL и намалување на LDL.

• Откажување од пушењето – Пушењето го намалува нивото на добриот холестерол и ги оштетува крвните садови, а со тоа го зголемува ризикот од срцеви заболувања. Откажувањето од пушењето носи бројни здравствени придобивки, и краткорочни и долгорочни.

• Стручни совети - Доколку имате висок холестерол, посетете го вашиот лекар за да го држите под контрола.

• Тестостеронот е клучен хормон за мускулна маса, сила, либидо и репродуктивни функции кај мажите, додека кај жените влијае на функцијата на јајниците, густината на коските и сексуалната желба. Тој може да има влијание врз нивото на холестерол и здравјето на срцето, но истражувањата за оваа врска сè уште не се доволни, заклучува д-р Гупта.