„Додека ја истражував Америка, се сретнав со оваа тема, но не можев ниту да замислам дека ќе биде уште полошо и потрауматично да се доживее во живо. Во некои моменти се прашував дали воопшто беше паметно да се дојде тука и да се види сето тоа. Тажно е да се дојде овде и да се сфати колку навистина им е потребна помош на овие луѓе и колку претрпеле. Државата нема сила, капацитет ниту способност да ја регулира оваа ситуација бидејќи на улиците на Кенсингтон редовно се појавуваат нови зависници кои одат кон сигурна смрт“, вели Дацешин.

50 пати посилен од хероинот

Дрогата која се користи во Кенсингтон е фентанил – 50 пати посилна од хероинот, а наменета е да ги смири големите животни како што се коњите. Ова е причината поради која луѓето имаат карактеристична свиткана положба на телото кога земаат доза од оваа дрога, бидејќи таа ја презема контролата врз нивните мускули, што доведува до неволно виткање на телото кон земјата, кое постепено се смирува додека дрогата исчезнува од телото.

„За жал, тогаш на зависниците им е потребна нова доза и маѓепсаниот круг само безнадежно продолжува. Доколку се прашувате како овие луѓе ја набавуваат дрогата и од каде ги добиваат парите, доволно е да се каже дека една доза од оваа дрога чини само пет долари“, раскажува Дацешин.

Не е за секого

Видеото на Дацешин за ова американско предградие содржи предупредување дека содржината не е за секого бидејќи содржи вознемирувачки снимки и сцени кои не им се препорачуваат на лицата помлади од 18 години, чувствителните лица и оние кои можат да бидат вознемирени од таквата содржина. А сцените во Кенсингтон се навистина потресни: луѓе кои користат игли на улиците без разлика на минувачите, а потоа изгубено се тетерават, спијат на улиците или лежат без свест и претставуваат составен дел од секојдневниот живот таму. Никој, освен криминалците, не беше задоволен од состојбата во Кенсингтон, една од најголемите области на отворена употреба и продажба на дрога.

Во предградијата на Филаделфија дрогата пристигнала во 1970-тите и постепено довела до големи профити, но и до насилство, а оваа област ја претворила во едно од најопасните места во земјата. Меѓутоа, бројот на смртни случаи од огнено оружје во Филаделфија е значително помал од бројот на предозирања. На почетокот, луѓето умираа од хероин, а во последниве години, деструктивните синтетички дроги како фентанил и ксилазин станаа повеќе барани.

Градските власти долги години најавуваат промени, но дали ситуацијата во Кенсингтон некогаш ќе се промени никој не може да предвиди.