[ФОТО/ВИДЕО] Во Дубаи се гради втората највисока зграда на светот: Облакодерот Бурџ Азизи ќе биде висок 725 метри

Минатата среда, компанијата за недвижности „Azizi Developments“ објави дека облакодерот Бурџ Азизи ќе достигне неверојатни 725 метри, со што ќе биде втората највисока зграда во светот.

„Од самиот почеток имавме планови за два дизајни – едниот за првично одобрената висина од 526 метри, а другиот за повисоката, сега одобрена висина од 725 метри“, изјави за Си-ен-ен, Мирвејс Азизи, основачот и претседател на „Azizi Developments.

Инвеститорот ги задржа своите „опции отворени за двете сценарија“ кога започна со подготвителната работа претходно оваа година. Со добиено зелено светло за поамбициозниот предлог за градба, дополнителната работа на темелите и столбовите е „веќе од одамна во тек“, додаде Азизи.

Облакодерот од 131 кат ќе вклучува апартмани, луксузен хотел со „седум ѕвезди“ со сите апартмани и седумкатен „вертикален“ трговски центар.

Лоциран на улицата Шеик Зајед, во квартот на Светскиот трговски центар во Дубаи, Бурџ Азизи сепак ќе биде нешто повеќе од 100 метри понизок од Бурџ Калифа.

Меѓутоа, лесно ќе ја победи локалната конкуренција за втората највисока зграда во градот, надминувајќи ја Марина 101 (371 метар). Но исто така Бурџ Азизи ќе ја надмине и моментално втората највисока зграда во светот, малезиската „Мердека 118“ која е висока 679 метри.

Се очекува дека облакодерот ќе постави неколку рекорди, вклучувајќи – највисоко лоби на светот (на 11 кат), највисок ноќен клуб на светот (на 126 кат), и највисоката светска опсерваторија (на 130 кат), велат од „Azizi Developments“.

Исто така градителот вели дека зградата ќе има и најголем ресторан во Дубаи (што значи дека неговиот простор на 122 кат ќе биде поголем од ресторанот на Бурџ Калифа – „At.mosphere“ на 122 кат) како и најголема хотелска соба во градот, на 118 кат.