За разлика од европските возачи, кои сè почесто мора да се помират со укинувањето на класичните модели, како легендарниот „Passat“ во лимузинска верзија, индискиот пазар и натаму ги обожава големите и пристапни семејни автомобили. „Virtus“ е поставен на посебна механичка платформа приспособена на локалните услови, која ја користи и неговиот директен ривал „Škoda Slavia“. Освежената верзија за претстојната година носи поагресивен преден браник, помодерни ЛЕД-светла и сосема нови алуминиумски бандажи, додека во кабината се очекуваат голема дигитална инструмент-табла и централен екран на допир, заедно со камера од 360 степени, безжично полнење на телефонот и ладење на седиштата во поскапите пакети опрема.

Проверени мотори и недостижен сон за Европејците

Кога станува збор за механиката, „Volkswagen“ не го менува проверениот рецепт, добро познат и на нашите возачи. Основната верзија ја придвижува еднолитарски турбобензински мотор со 115 коњски сили, достапен со рачен менувач или нов осумстепен автоматски менувач. За оние што бараат подобри перформанси, тука е посилниот агрегат од 1,5 литри со 150 коњски сили, спарен со брз автоматски менувач со двојна спојка.

Она што убедливо најмногу ги боли европските купувачи е официјалниот ценовник. Почетниот модел моментално чини само нешто повеќе од 10 илјади евра, додека најскапата и најопремената верзија не ја надминува сумата од 18.350 евра. Иако се очекува благо поскапување по декемврискиот редизајн, „Virtus“ и натаму ќе нуди апсолутно најдобар сооднос меѓу големината, квалитетот и цената во светот. За жал на сите нас, германскиот производител нема апсолутно никаква намера некогаш да им го понуди овој одличен и исплатлив модел на возачите на Стариот континент.