Како што пишува грчки „Јефимерида“, италијанскиот готвач Давиде Тамбурела работел како главен готвач во ресторанот „Ла Коста“ во австралискиот град Бризбејн. Ресторанот се претставувал како место кое им нуди на гостите автентично искуство со италијанската кујна, но токму прашањето за автентичноста станало причина за конфликт.

Вкусот бил „јаболко на раздорот“

Проблемот се појавил кога еден гостин побарал пица со шунка и ананас, комбинација која е многу популарна во некои делови од светот, но која многу Италијанци ја сметаат за неприфатлива.

Тамбурела одбил да подготви таква пица, тврдејќи дека додавањето ананас е навреда за неговата култура.

Сепак, тоа не бил изолиран случај. За време на постапката пред Австралиската комисија за фер работа, било утврдено дека готвачот три пати одбил да изврши таква нарачка.

Неговиот работодавец, Елиот Инграм, верувал дека тоа е деловна одлука и обврска кон гостите.

Всушност, ресторанот организирал голема прослава, чија вредност надминала 15.000 австралиски долари, а гостинот кој платил за настанот посебно побарал меѓу јадењата што се служат да бидат пици со шунка и ананас.

Инграм објаснил дека самиот не е посебен обожавател на таа комбинација, но дека во текот на неговите 17 години работа во угостителската индустрија, научил дека не треба да се судираат околу барањето на секој гостин.

Тој додал дека ресторанот имал пица со ананас дури и во детското мени.

Тамбурела, сепак, стоел зад својот став и му рекол на својот работодавец дека треба да истражи колку е важно за Италијанците да не ставаат ананас на пицата.

Готвачот бил отпуштен на 20 мај, откако претходно бил повикан да разговара за прашања поврзани со перформансите.

Отпуштањето го чинело многу повеќе од работата

Имено, повеќе од три години, Тамбурела бил во процес на добивање австралиска виза категорија 186, што овозможува стекнување постојан престој со поддршка на работодавец.

Инграм изјавил дека чекал колку што дозволува законот пред да пријави кај властите дека готвачот повеќе не работи во ресторанот, надевајќи се дека во меѓувреме ќе му биде одобрена визата.

Сепак, тоа не се случило. По прекинувањето на работниот однос и повлекувањето на издршката од работодавецот, Тамбурела морал да го започне процесот одново.

Италијанскиот готвач се обидел да го оспори отпуштањето пред Австралиската комисија за фер работа, но неговата жалба била одбиена бидејќи била поднесена по законскиот рок.

Приказната добила уште еден необичен пресврт. Ресторанот „Ла Коста“ оттогаш е затворен, додека Тамбурела нашол нова работа во друг италијански ресторан. А таму, според грчкиот портал, во менито нема пица со ананас.