Токму како што најавуваа минатата пролет, од „Citroën“ на Салонот за автомобили во Париз официјално го претставија „2 CV Concept“, модерна и компактна интерпретација на својот историски модел. Концептот, со должина од 3,76 метри, во гамата се сместува меѓу моделите „Ami“ и „C3“ и служи како најава за сериско возило кое францускиот производител планира да го воведе во понудата до 2028 година. Автомобилот ќе се произведува во Европа, ќе ги исполнува претстојните европски прописи за мали електрични возила („E-Car“) и цели кон почетна цена од околу 15.000 евра.

Идејата на овој концепт се темели на принципот на едноставност и намалување на масата, што оди спротивно на трендот на сè поголеми, потешки и поскапи возила. Со целна маса од околу еден тон, возилото бара помала и попристапна батерија приспособена за секојдневно возење. Главниот извршен директор на „Citroën“, Ксавие Шардон, истакна дека целта на проектот не била копирање на минатото, туку редефинирање на клучните вредности на оригиналниот модел – пристапноста, практичноста и слободата на движење – во современо електрично опкружување.

Визуелен наследник на иконата

Надворешниот дизајн ја задржува култната и од многумина обожавана силуета, како и препознатливите линии на оригиналниот „Спачек“, со модерни стилски елементи како кружни одвоени предни светла, LED светлосен потпис и вертикално ветробранско стакло. Каросеријата на прикажаниот концепт е изведена во јаркоцрвена боја, додека црниот заден капак и 18-инчните челични бандажи директно потсетуваат на првата генерација. На ветробранското стакло се истакнати броевите 48, 90 и 26, кои ја означуваат годината на премиерата на оригиналот (1948), завршувањето на производството (1990) и годината на претставувањето на новиот концепт (2026).

Практичноста на конструкцијата се гледа и во решенијата наменети за поедноставно сериско производство и поправки, како рамните површини, директните отвори за довод на воздух под ветробранското стакло и одвоените браници кои можат поединечно да се заменуваат. Во рамките на соработката со компанијата „Michelin“, на возилото е применета технологија на „универзален дигитален близнак на гумата“, која овозможува приспособување на однесувањето на возилото на условите на патот и постојан надзор на состојбата на гумите.

Иновативна внатрешност

Внатрешноста на концептот нуди пространа и светла кабина благодарение на платнениот покрив што се склопува и отстранувањето на класичната контролна табла. Наместо неа е вграден попречен „цилиндар“ на кој се поставени волан со еден крак, командите и мултифункционален екран, заедно со квадратен екран на допир од 8 инчи. Возилото вклучува и пренослив звучник наречен „Radioën“, кој може да се користи надвор од автомобилот, широки седишта и отстранлива кошница за складирање, изработена од дрво и биопластика произведена со 3Д-технологија.

Кабината е симпатично, но рудиментарно дизајнирана. Се издвојува од конкуренцијата со жолтиот кариран дезен на седиштата и деталите во беж боја, додека преградите во вратите содржат посебни држачи за јајца во знак на почит кон оригиналните спецификации на „2 CV“. Дополнителните посвети на историскиот модел вклучуваат педали со ознака на желка за сопирачката и зајак за гасот, звук на сирената и електромоторот при стартување кој го имитира оригиналниот модел, како и регистарски таблички со прекарите што ги носел „2 CV“ во различни земји.