Њујоршката недела на уметноста „Armory Week“ оваа година на посетителите им претстави необична соработка меѓу „Lexus“ и њујоршкиот концептуален уметнички колектив „MSCHF“. Под името „MOTOMORPHOSIS“, нивната изложба претставува два сериски електрични автомобили на јапонскиот производител, кои се целосно преработени во надреални скулптурални форми. Станува збор за препознатлив мотив на овој колектив, кој пластичноста и геометријата на тридимензионалната анимација ги пренесува во физичкиот свет, создавајќи илузија на движење кај статични објекти.

Статичен впечаток на движење

Изложбата ги поставува еден наспроти друг оригиналните автомобили и нивните „извртени“ двојници. Моделот „Lexus RZ 450e“ се појавува во својот оригинален облик на електрично возило, но и како скулптура наречена „Circle Car“, обликувана во затворена јамка во која возилото се движи во круг – како да се обидува да ја фати сопствената опашка. Сличен пристап е применет и кај моделот „Lexus RX 450h+“, кој покрај стандардната изведба е претставен и преку делото „Twisted Car“, со драматична надолжна торзија, при што линиите на површината и карактеристиките на автомобилот се растегнати долж спиралното тело.

Уметниците од колективот „MSCH-F“ овие експонати ги дефинираат како „form-cars“, наместо како вообичаени концептни автомобили, со што се нагласува пресвртот во нивната функција. Додека класичното возило е инженерски проектирано за движење низ просторот, овие дела се скулптурално обликувани со цел визуелно да ги прикажат самата идеја и чувството на движење, и покрај тоа што се статични.

„Скулптурите ја нагласуваат флуидноста на човечката перцепција и нераскинливата врска меѓу предметот и неговиот капацитет за динамика“, објаснуваат авторите.