Иако „Dacia Sandero“ е на пат трета година по ред да стане најпродаваниот автомобил во Европа, со оглед на тоа каква тортура трпи компактната класа поради SUV-моделите, мора да се признае дека „Volkswagen Golf“ и понатаму го потврдува статусот на еден од најпопуларните автомобили на Стариот Континент.
Помина повеќе од половина век од претставувањето на првата генерација, а овој германски компакт е најпродаваниот модел на „Volkswagen“ и вториот најпродаван нов автомобил во Европа.
Според најновите податоци на компанијата „Dataforce“, во првите осум месеци од 2026 година во Европа се продадени 133.249 примероци на „Volkswagen Golf“.
Пред него е само достапната „Dacia Sandero“, со 145.424 продадени примероци, додека третото место го зазеде „Volkswagen T-Roc“ со 132.845 возила, кој, со оглед на преференциите на купувачите, веќе требаше да го „издува“ „Golf“ зад себе. Инаку, „VW T-Roc“ и „Tesla Model Y“ беа најбараните автомобили во Европа во август.
Компактната класа речиси исчезна
Резултатот на „Golf“ е особено интересен ако се погледне што се случило во меѓувреме со целата класа и со неговите некогашни конкуренти.
Компактната класа, каква што ја познававме пред 15 години, денес речиси исчезна. „Ford Focus“, „Renault Megane“, „Fiat Bravo“, „Lancia Delta“, „Alfa Romeo Giulietta“ и бројни други модели кои некогаш ја сочинуваа основата на европскиот пазар веќе не се произведуваат.
Нивното место во голема мера го зазедоа SUV и кросовер-моделите. Купувачите се свртеа кон повисоката позиција на седење, поголемата практичност и поробустниот изглед, па за производителите денес често има повеќе смисла да понудат кросовер отколку класичен компактен хечбек.
Тоа јасно се гледа и на актуелната листа на продажба. Освен „Golf“, меѓу десетте најпродавани автомобили се наоѓаат „T-Roc“, „Model Y“, „Yaris Cross“, „Tiguan“ и „Peugeot 2008“. Значи, дури половина се SUV, односно кросовер-модели.
„Golf“ не се предава
Токму поради тоа, 133.249 продадени примероци се уште позначаен резултат за „Golf“. Моделот кој првпат беше претставен во далечната 1974 година ги преживеа смената на генерациите, промената на вкусовите на купувачите и незапирливиот подем на SUV-моделите. Додека многу од неговите некогашни ривали исчезнаа од понудата, жилавиот „Golf“ и понатаму се држи при самиот врв на европската продажба.
Не само што остана меѓу најпродаваните, „Golf“ моментално е втор автомобил според продажбата во Европа, веднаш зад „Sandero“, а има и мала предност пред третопласираниот „T-Roc“.
Тоа можеби најдобро покажува колку длабоко е вкоренет „Golf“ на европскиот пазар. Компактната класа се намали, конкуренцијата се промени, SUV-моделите го презедоа пазарот, но „Golf“ сè уште не го кажал последниот збор.
