„Range Rover“ го претстави електричниот „Range Rover Sport“, кој располага со 542 КС, голема батерија од 118,5 kWh и деклариран досег од околу 602 километри.
Технички, овој модел е речиси идентичен со неодамна претставениот „Range Rover Electric“, но кај „Sport“ потпирањето е приспособено со поизразен фокус на динамиката. Од „Range Rover“ велат дека електричниот „Sport“ треба да понуди исто ниво на префинетост, луксуз и теренски способности како моделите со мотори со внатрешно согорување.
Двата електромотори развиваат вкупно 542 КС и околу 850 Nm вртежен момент. Благодарение на тоа, „Range Rover Sport Electric“ забрзува од 0 до 100 km/h за само 4,3 секунди. Сепак, целта не била електричниот SUV да биде само брз на права линија. „Range Rover“ го опишува како модел со најголем фокус на динамиката во досегашната понуда на верзијата „Sport“.
Големата батерија со употреблив капацитет од 118,5 kWh е сместена во подот на возилото. Освен што овозможува голем досег, ваквата конструкција го спушта тежиштето во споредба со „Range Rover Sport“ со мотор со внатрешно согорување.
Електричниот „Sport“ ја доби и најцврстата каросерија во семејството на овој модел, како и низа системи кои треба да го подобрат однесувањето при возење. Меѓу нив се активната контрола на навалувањето на каросеријата, адаптивното потпирање и управувањето со задните тркала.
„Range Rover“ наведува дека автомобилот е развиен така што истовремено треба да понуди подинамично и повозбудливо возење на пат и да задржи широк спектар способности надвор од асфалтот.
Батеријата користи 800-волтна електрична архитектура, па е овозможено DC полнење со моќност до 350 kW. Батерискиот пакет е целосно запечатен, што овозможува возење низ длабока вода и задржување на теренските способности кои се очекуваат од еден „Range Rover“. Визуелно, „Sport Electric“ многу дискретно се разликува од верзиите со мотори со внатрешно согорување. Најголемите разлики се поинаку обликуваната предна маска и посебните фелни, додека остатокот од дизајнот практично останува непроменет.
