Полскиот рели-возач Мико Марчик постави нов светски рекорд откако помина повеќе од 1.300 километри со „Audi A6 e-tron“ со само едно полнење.
Колку може да помине еден електричен автомобил со едно полнење доколку се вози максимално ефикасно? Европскиот рели-шампион Мико Марчик успеа да извлече дури 1.338 километри од „Audi A6 Sportback e-tron Performance“ и притоа да постави нов Гинисов светски рекорд.
Марчик на тој начин го надмина досегашниот рекорд што во 2025 година го постави „Lucid Air Grand Touring“, поминувајќи 1.205 километри со едно полнење. Особено интересно е што новиот рекорд е поставен на јавни патишта во Полска, во редовен сообраќај, и тоа со автомобил чиј официјален досег изнесува меѓу 681 и 776 километри.
Имено, неговиот храбар обид започнал во полскиот град Закопане, каде што планинските падини на Татрите овозможиле совршена можност за максимално искористување на регенеративното сопирање, клучен фактор за продолжување на досегот на секое електрично возило.
Потоа, рутата го одвела до Краков, а оттаму по живописната долина на реката Висла сè до Сандомјеж. Марчик го продолжил патувањето минувајќи низ градови како Варшава, Торуњ и Гдањск, сè додека не стигнал до полуостровот Хел на самиот север на земјата. На таа точка возачот се свртел и почнал да се враќа по истиот пат.
Кога автомобилот конечно останал без енергија, некаде меѓу Торуњ и Цјехоцинек, бројачот покажувал неверојатни 1.338 километри поминати со едно полнење на батеријата. Овој подвиг се одвивал на јавни патишта отворени за редовен сообраќај, при што многу делници биле поминати во услови на голем сообраќаен метеж. Сепак, треба да се има предвид дека просечната брзина за време на ова исцрпувачко патување, кое траело повеќе од 45 часа, изнесувала помалку од 30 километри на час.
Интересен е и податокот дека Марчик сега во свои раце ги држи Гинисовите светски рекорди и за возила со мотори со внатрешно согорување и за целосно електрични возила. Во текот на 2025 година поставил рекорд за најголемо растојание поминато со еден резервоар гориво, возејќи „Škoda Superb“. Тогаш успеал да помине дури 2.831 километар, постигнувајќи притоа неверојатна просечна потрошувачка на гориво од само 2,6 литри на 100 километри.
