Производството заврши по само неколку години, но тоа не значи дека концептот е засекогаш напуштен.

Од „Lamborghini“ сè уште официјално не ја потврдиле „Sterrato“ верзијата на новиот суперавтомобил „Temerario“, кој го придвижува „twin-turbo V8“ мотор, меѓутоа челниците на компанијата не ја отфрлаат таа можност.

Изјави од врвот на компанијата

Директорот на производната линија на „Lamborghini“, Паоло Ракети, неодамна за „CarExpert“ изјави дека таков модел би можел повторно да се појави.

„Дефинитивно би можел да постои автомобил како ’Sterrato‘. Не велам дека планираме да го направиме тоа, но не ја исклучувам можноста тоа да се повтори“, изјави Ракети.

Иако тоа не е официјална потврда, отвора простор за развој на „Temerario Sterrato“.

Ова не е првпат од компанијата да пристигнуваат такви сигнали. Во јули, на Фестивалот на брзината во Гудвуд, директорот за маркетинг и продажба Федерико Фоскини изјави дека компанијата и понатаму разгледува дополнителни „Sterrato“ модели.

„Тоа е можност која секако можеме да ја разгледаме“, рече тој.

Фоскини призна дека „Lamborghini“ не може истовремено да ги развива сите можни изведби, но додаде дека идејата ќе остане во план по успехот на „Huracán Sterrato“. Тој посочи и дека постојните платформи би можеле да овозможат релативно едноставен развој на таков модел.

Како пример го наведе „Urus SE“ и истакна дека нема голема разлика меѓу стандардниот „Urus“ и она што би можела да биде неговата „Sterrato“ верзија. Тој смета дека „Lamborghini“ би можел да употреби поинакви гуми, да ја приспособи суспензијата и да стави поголем акцент на теренското возење без потреба од темелни измени на возилото.

Каков би бил „Temerario Sterrato“?

„Temerario“ е наследник на „Huracán“ и основниот суперавтомобил во понудата на „Lamborghini“. За разлика од претходникот, користи „plug-in“ хибриден погон составен од 4,0-литарски „V8“ мотор со два турбополначи и три електромотори. Системот развива вкупна моќност од 920 КС, што овозможува забрзување од 0 до 100 км/ч за 2,7 секунди и максимална брзина од 343 км/ч.

Претходниот „Sterrato“ беше 44 милиметри повисок од стандардниот „Huracán Evo“, имаше поширока трага на тркалата, дополнителна заштита на подвозјето и посебен режим на возење „Rally“. „Temerario Sterrato“ веројатно би следел сличен рецепт.

Може да се очекуваат поголемо растојание од подлогата, поробустен дизајн на каросеријата, заштита на долниот дел од автомобилот и гуми приспособени за возење по макадам.

„Lamborghini“ сè уште не открил никакви детали за потенцијалниот автомобил, па точната формула останува непозната. Засега „Temerario Sterrato“ е само можност, меѓутоа се чини дека компанијата не сака да ја отфрли таа идеја, пренесува „Index“.