По 21 година на директорската позиција во „Порше Македонија“, д-р Златко Муцунски најави заминување од компанијата. Во прошталната објава на „LinkedIn“, долгогодишниот менаџер порача дека по 34 години професионална поврзаност со групацијата „Volkswagen“ во Македонија, сака повеќе време да им посвети на личниот живот, блиските луѓе и новите искуства.
Разделбата со колегите била одбележана на меѓународниот менаџерски самит на „Porsche Holding“ во Задар, Хрватска. Муцунски го опиша настанот како особено емотивен, осврнувајќи се на кариера во која, покрај деловните резултати, стекнал пријателства и спомени што ќе ги задржи и по заминувањето.
Во својот осврт тој ги издвои повеќе од 50.000 испорачани возила во Македонија и учеството на бројни меѓународни настани на кои ги претставувал брендовите на групацијата. Истакна и дека зад себе остава силна компанија и мотивиран тим, подготвен да го продолжи развојот.
„Чувствувам дека е дојдено време да свртам нова страница“, порача Муцунски.
Во објавата не е наведено кој ќе ја преземе функцијата генерален директор.
Неговиот пат до раководната позиција започнал многу пред основањето на „Порше Македонија“. Во интервју објавено во 2015 година за НАПАГ, Муцунски раскажал дека работел како конструктор во МЗТ, а потоа се приклучил на постпродажниот тим на „Асиба МГ“, тогашен застапник на брендовите „Volkswagen“, „Audi“ и „Porsche“ во земјава. Подоцна станал раководител на тој тим, а кариерата ја продолжил во постпродажбата на „СА & Са Компани“.
По преземањето на бизнисот од „Porsche Holding“ во 2005 година, му била понудена раководната позиција во „Порше Македонија“. Во истото интервју, како свој најголем професионален успех го издвоил создавањето посветен тим, нагласувајќи дека развојот на компанијата го поврзува со луѓето што работат во неа.
Во текот на неговиот мандат, во рамките на комплексот на компанијата бил отворен и „Porsche Centar Skopje“. Според официјалната страница на центарот, тој започнал со работа на 22 септември 2016 година како продажно-сервисен центар за брендот „Porsche“.
Заминувањето Муцунски го претставува како лична пресвртница по повеќедецениска работа во автомобилскиот сектор. Во прошталната порака им се заблагодари на колегите и на холдингот за довербата, поддршката и можностите, нагласувајќи дека професионалното поглавје завршува, но врските создадени во тој период остануваат.
