Во тимот го вклучија и еден човек кој воопшто не настапи на турнирот – членот на аргентинскиот стручен штаб Роберто Ајала, поради ударот врз Дани Олмо по завршувањето на финалето.

За тренер на најголемото разочарување беше избран германскиот селектор Јулијан Нагелсман.

Најлошиот тим на Светското првенство според „Gazzetta dello Sport“

Голман: Фернандо Муслера

Четириесетгодишниот Уругваец направи големи грешки на натпреварите против Саудиска Арабија, Зеленортските Острови и Шпанија, а со серија лоши реакции директно ѝ наштети на својата репрезентација.

Десен бек: Калиду Кулибали

Искусниот капитен на Сенегал разочара на натпреварите против Франција и Норвешка, по што го загуби местото во стартниот состав и остатокот од првенството главно го мина на клупата.

Централен дефанзивец: Роберто Ајала

Помошникот на Лионел Скалони се најде во овој избор поради еден од најнеубавите потези на турнирот – по поразот во финалето го удри Дани Олмо во лицето.

Лев бек: Тео Ернандез

Французинот лошо го започна првенството, го загуби местото во првиот тим, а потоа целосно потфрли и на натпреварот за третото место против Англија, по што беше заменет уште на полувремето.

Десно крило: Агустин Канобио

Уругваецот го заврши турнирот со брутален старт врз Пау Кубарси, контакт со судијата и обид да предизвика тепачка по добиениот црвен картон.

Играч за врска: Хакан Чалханоглу

Капитенот на Турција не успеа да ја предводи својата репрезентација, која беше елиминирана по само два натпревари, а според „Gazzetta dello Sport“, токму поради неговиот статус носи поголема одговорност од останатите.

Играч за врска: Витиња

Од човекот кој доминираше во дресот на ПСЖ се очекуваше да биде лидер на Португалија, но на Светското првенство делуваше безидејно, просечно и далеку од нивото на најдобриот играч за врска во светот.

Лево крило: Асим Мадибо

Фудбалерот на Катар на натпреварот против Канада со тежок старт му ја скрши ногата на Исмаел Коне, иако и самиот беше видно потресен кога сфати какви последици предизвикал.

Офанзивен играч за врска: Ајдин Хрустиќ

Австралиската „десетка“ пред натпреварот тврдеше дека е подготвен да изведува пенали, но во пенал-серијата против Египет одговорноста ја презедоа неговите помлади и помалку искусни соиграчи.

Офанзивен играч за врска: Лерој Сане

Сане беше симбол на бледата и безопасна Германија, а турнирот го заврши без посериозно влијание врз играта, пред Нагелсман да го замени во поразот од Парагвај.

Напаѓач: Кристијано Роналдо

Португалецот постигна три гола, но против најсилните противници изгледаше пасивно и далеку од своето некогашно ниво, додека Меси, Халанд и Кејн беа играчите што ја одбележаа завршницата на турнирот.

Селектор: Јулијан Нагелсман

Под негово водство, Германија стана најголемото разочарување на Светското првенство, ги загуби натпреварите против Еквадор и Парагвај, а беше елиминирана уште во првото коло од нокаут-фазата.