Познатиот милијардер сакал да изневерува, а Џефри се обидел да дознае за тоа, па тајно му понудил пријателство за да не зборува јавно за тоа.
Основачот на „Мајкрософт“, Бил Гејтс, за време на затворено сослушување пред Надзорниот комитет на Претставничкиот дом на американскиот Конгрес, тврдеше дека покојниот финансиер и осуден сексуален престапник Џефри Епштајн знаел за неговите вонбрачни афери и наводно се обидел да го натера да обнови контакт со него.
Според транскриптот од разговорот објавен на 23 јуни, Гејтс рекол дека Епштајн имал чувствителни информации од неговиот приватен живот, вклучително и информации за неверства за време на неговиот брак со Мелинда Френч Гејтс.
Гејтс нагласил дека никогаш не бил обвинет за никаква нелегална активност поврзана со Епштајн и постојано негирал какво било „несоодветно однесување“. Сослушувањето се одржа како дел од истрагата поврзана со објавувањето на документи познати како „досиејата на Епштајн“.
За време на сведочењето, милијардерот изјавиl дека помеѓу 2011 и 2014 година имал професионален однос со Епштајн, но подоцна дознал дека финансиерот бил запознаен со деталите од неговиот приватен живот.
„Дури подоцна дознав дека Епштајн станал свесен за чувствителни информации за мојот приватен живот, вклучително и фактот дека сум бил неверен во бракот. Тие афери немаа никаква врска со моите контакти со Епштајн, но беа болни за моето семејство“, изјавил Гејтс.
Во своето сведочење, тој идентификуваше три жени со кои имал вонбрачни врски за време на бракот. Станува збор за бриџ играчката Мила Антонова, нуклеарниот научник Карима Нигматулина и докторката Алис Џејкобс Неселродт, која ја запознал на конференција пред 2010 година.
Гејтс тврди дека лицето кое го запознало со Епштајн веројатно било извор на информации за неговите врски.
„Епштајн се обидел да ги искористи информациите за моите неверства, заедно со многу лаги што ги додаде, за да ме натера повторно да воспоставам контакт со него. Не успеал во тоа, но тоа ги покажува начините на кои се обидел да ја искористи нашата врска за да ги постигне своите цели. Никогаш не требало да го запознаам“, изјавил Гејтс.
Тој додал дека никогаш не добил директна закана.
„Никогаш немало отворено предупредување во стилот: „Ако не направиш нешто, ќе откријам сè“. Тој користел скриени пораки како: „Треба да останеме пријатели“.
Гејтс и Мелинда Френч Гејтс го завршија својот брак во 2021 година по 27 години заеднички живот. Нивниот развод привлече огромно внимание од јавноста, а самиот Гејтс подоцна призна дека неверството е една од најголемите грешки во неговиот приватен живот.
