Возачот на „Mercedes“ Кими Антонели ја освои пол-позицијата на патеката во Кина.
Возачот на „Mercedes“ Кими Антонели ја освои пол-позицијата за Големата награда на Кина и така стана најмладиот возач во историјата на „Формула 1“ кој стартувал од првото место, на само 19 години, шест месеци и 17 дена. Неговиот најбрз круг изнесуваше 1:32.064 минути, што му донесе предност од 222 илјадитинки во однос на тимскиот колега Џорџ Расел.
Расел имаше проблеми за време на квалификациите – оштетено предно крило и застанување на патеката во последниот дел му оневозможија да се бори за пол-позицијата. И покрај тоа, успеа да заврши втор и така да се квалификува во првиот стартен ред, додека Антонели беше доминантен и не им дозволи на ривалите од „Ferrari“ сериозно да му се заканат.
Во борбата за третото место Луис Хамилтон во „Ferrari“ беше побрз за 13 илјадитинки од Шарл Леклер, додека зад нив се најдоа Оскар Пјастри и Ландо Норис од „Mercedes“. Големо изненадување приреди Пјер Гасли во „Alpine“, освојувајќи го седмото место пред Макс Ферстапен и Исак Хаџар од „Red Bull“, додека меѓу првите 10 заврши и Оли Берман од „Haas“.
Раните делови од квалификациите поминаа без поголеми изненадувања, додека елиминирани беа возачите на „Williams“, „Aston Martin“ и „Cadillac“, а Карлос Саинц јуниор беше првиот под линијата за пласман. Вториот дел од квалификациите го одбележа инцидентот на Габриел Бортолето од „Audi“, што им го попречи обидот на некои возачи да постават брзи кругови. Нико Хилкенберг, Франко Колапинто, Естебан Окон, како и двоецот на „Racing Bulls“ – Лиам Лосон и Арвид Линдблад – не успеаја да се пласираат во завршниот дел.
