Една од најголемите алпски скијачки на сите времиња, Американката Линдзи Вон, минува низ најтешкиот период во својата кариера и живот по страшниот пад на Зимските олимписки игри во Кортина д’Ампецо. Во својата најнова објава на „Instagram“ сподели исклучително емотивен момент од повторната средба со своето куче, откривајќи колку е тешка борбата што ја води.

Трогателна средба и тешки денови

На снимката што ја сподели со следбениците, Вон седи во фотелја, очигледно во болки и со ограничени движења, додека ѝ приоѓа кучето Ченс. Моментот на чиста радост и безусловна љубов од миленикот, кој скокајќи и галејќи се едвај ја дочека повторната средба со сопственичката, трогна многумина. Но описот на објавата открива драма што се одвива зад оваа топла сцена.

„Повторно обединета со Ченс … Вчера ми беше прилично тежок ден, сè ме погоди силно и се скршив. Знам дека ќе има уште многу вакви денови … внатрешната ментална битка штотуку почна, но моменти како овој многу ми помагаат. Само ми недостига моето момче Лео … Ден по ден“, напиша Вон во емотивното признание.

Оваа објава доаѓа само еден ден откако призна дека „менталната битка ја погодила како тон цигли“, потврдувајќи дека покрај тешкото физичко закрепнување ја очекува и огромен психолошки предизвик. Реакциите на нејзините обожаватели беа исполнети со поддршка. „Продолжи така, шампионке!“, „Кучињата се апсолутно најдобар лек“ и „Остани силна“ се само дел од коментарите што ја преплавија нејзината објава.

Закрепнување по падот што го шокираше светот

Да потсетиме, 41-годишната Вон доживеа тежок пад на 8 февруари за време на спуст трката на Олимписките игри, на кои се врати по шестгодишна пауза и со вградена делумна протеза на коленото. Падот се случи само тринаесет секунди по стартот на трката, а тежината на повредите беше толкава што лекарите едвај ѝ ја спасија левата нога од ампутација.

Како што откри по излегувањето од болница на 23 февруари, развила опасен компартмент синдром – состојба при која притисокот во мускулите расте до критично ниво, заканувајќи се со трајно оштетување на ткивото. Итна операција, фасциотомија, ѝ го спаси екстремитетот. Се здоби со комплексна скршеница на тибијата, скршеница на главата на фибулата, скршеница на тибијалното плато и скршен десен зглоб. Во моментов е неподвижна и користи инвалидска количка, а се проценува дека само заздравувањето на коските ќе трае околу една година, по што ја очекува операција на предниот вкрстен лигамент.