Незадоволството кај навивачите расте додека сведочат на целосен распад во клубот, што би можело да има тешки последици во годините што доаѓаат, пишува „talkSPORT“. Експертот за фудбалски финансии Киријан Магвајр објасни за какви суми станува збор.

„Да, испаѓањето за Тотенхем би било финансиска катастрофа. Мислам дека при преминот од Лигата на шампионите, каде што се сега, во Чемпионшип, зборуваме за потенцијално намалување на приходите од околу 250 милиони фунти“, истакна тој и додаде:

„Минатата година од Премиер лига добија 127 милиони фунти (околу 146 милиони евра). Тоа во понискиот ранг би се свело на 45 милиони (околу 52 милиони евра). Не би го добиле ни парите од Лигата на шампионите, каде досега заработија 70 милиони фунти (околу 80 милиони евра), плус приходите од билетите за тие натпревари“, рече тој.

Приходите од билети исто така драстично би паднале. „Тешко ќе се привлечат 62.000 гледачи на натпревар против, на пример, Линколн Сити во вторник навечер. Навивачите на Спарс го поддржуваат својот клуб, но ќе биде многу тешко да се оствари таква заработка.“

„А тука се и спонзорите“, додаде Магвајр. „Имаат договор со компанијата ‘AIA’ вреден 40 милиони фунти (околу 46 милиони евра) и голем договор со ‘Nike’. Веројатно и во тие договори постојат клаузули во случај на испаѓање.“

Заминување на играчи и договори без заштита

На прашањето дали играчите на Тотенхем во своите договори имаат клаузули што би довеле до намалување на платите или пониски откупни клаузули во случај на испаѓање, Магвајр беше јасен.

„Договорите на играчите во елитните клубови од Премиер лига главно се насочени кон бонуси за пласман во Лигата на шампионите. Клубови како Спарс никогаш не би ја ни разгледувале можноста за испаѓање, па малку е веројатно дека такви клаузули постојат.“

Сепак, тој предвидува масовен егзодус на крајот од сезоната.

„Очекувам егзодус. Клубот ќе сака да ги монетизира играчите, а тие ќе сакаат да играат на највисоко ниво. Ќе има такви што ќе сакаат да заминат, но и такви од кои клубот ќе сака да се ослободи. Тоа ќе помогне во намалување на трошоците за плати, а во корист на Тотенхем оди фактот што веќе сега имаат убедливо најнизок буџет за плати во таканаречената ‘Голема шесторка’. Но, и понатаму ќе биде предизвик, особено бидејќи должат 300 милиони фунти (околу 344 милиони евра) за неплатени обесштетувања за играчи што веќе ги довеле на рати.“

Бесни навивачи и цени на билетите

Уште една потенцијално голема загуба на приходи за клубот би можела да дојде од самите навивачи. Спарс веќе најавија дека ги замрзнуваат цените на сезонските билети за следната сезона, при што најевтиниот за возрасни изнесува 856 фунти (околу 982 евра). Сепак, навивачите сигурно ќе бараат пониска цена доколку нивниот клуб заврши во ‘Championship’.

„Од клубот веројатно ќе тврдат дека за таа цена добивате повеќе натпревари, со оглед на тоа што во ‘Championship’ се играат 23 домашни натпревари наместо 19“, вели Магвајр. „Но, навивачите на Тотенхем ќе бидат многу лути, и онака веќе се незадоволни од односот на клубот кон постарите навивачи. Им ги менуваат местата на стадионот, а попуст за пензионери сега добиваат дури од 67 наместо од 65 години.“

Магвајр заклучува дека незадоволството околу цените веќе тлее. „Во целата Премиер лига, Спарс имаат втори највисоки цени, веднаш зад Арсенал, со просечна цена на билет од 101 фунта (околу 116 евра). Тоа во Чемпионшип не може да се оправда, па сигурно ќе има последици.“