Руски суд осуди американски државјанин на пет години затвор, затоа што со јахта впловил во земјата со пушка, за да се сретне со Русинка што ја запознал на интернет.
Чарлс Вејн Цимерман е осуден за илегален транспорт на оружје, откако руските цариници откриле пушка и муниција на неговиот брод „Trude Zena“, кога пристигнал во црноморското пристаниште Сочи на 19 јуни 2025 година, пренесе „Moscow Times“.
Маж од Северна Каролина изјавил пред рускиот суд дека го препловил Атлантикот и Средоземното Море за да запознае жена со која првично стапил во контакт на интернет.
„Запознал девојка која живее во Казањ преку интернет и решил да отпатува во Русија со својата јахта“, соопштила во понеделникот заедничката прес-служба на судовите на Краснодарскиот крај.
„Пред да тргне на пат, не се потрудил да ги проучи законите на Руската Федерација и претпоставил дека оружјето што го држел на својата јахта за самоодбрана едноставно треба секогаш да остане на бродот“, пишува во соопштението.
Не беше веднаш јасно кога Цимерман бил осуден, бидејќи неговото апсење и подоцнежното судење не биле објавени во руските медиуми пред објавата во понеделник.
Централниот окружен суд во Сочи објавил снимка што го прикажува моментот на апсењето на Цимерман минатата година на неговата јахта долга 10 метри.
На снимката, исто така, се гледа црна ловечка пушка во футрола и две кутии муниција „Remington“, од кои дел изгледаат ’рѓосано.
Тој испловил од Форт Мејкон во Северна Каролина на 1 јули 2024 година, информирајќи ги најблиските дека оди кон Нов Зеланд, пред да го промени курсот и да отплови кон Европа.
„Последен пат се слушнале со него на 23 јули. Тој информирал член на семејството дека ќе исплови со својата едрилица на пат кон Средоземното Море“, соопштила Крајбрежната стража на САД во предупредување за исчезнато лице издадено во септември 2024 година.
Авантурата од САД до Русија траела долги 11 месеци.
