Нејзината снимка јасно покажува колку е важно слоевитото облекување за зачувување на телесната топлина на исклучително ниски температури.

„Како што можете да замислите, облекувањето на ваков студ е пресудно. Носам волнени хеланки и панталони полнети со пердуви. Потоа облекувам синтетички основен слој и Ulvang џемпер од чиста волна од Норвешка. Ќе забележите дека го носам околу 300 дена во годината“, објаснила Павлина во видеото.

Таа додала дека носи и пар тенки волнени чорапи, како и традиционални меки чизми кои најчесто се изработени од животинска кожа. Својата комбинација ја надополнила со специјални модни додатоци.

„Имам и ракавици од даброво крзно, а бидејќи денес е особено студено, носам јакна од фока што ја купив на Гренланд, каде што учествував на скијачко натпреварување“, рекла Павлина. На крај додала уште два шалови од мерино волна и капа со крзно.

Посебна заштита за бебето

Освен за себе, Павлина покажала и како го облекува своет бебе за излегување на екстремниот студ. Објаснила и дека и тука се потпира на волнени слоеви: боди, џемпер, панталони и зимски комбинезон. Количката дополнително е заштитена со волнено ќебе, вреќа за спиење и посебен покривач кој ја задржува топлината.

Живот на Јукон

Јукон, територија на северозападот на Канада што се граничи со Алјаска, е позната по суровите зими, но и по единствениот начин на живот приспособен на екстремните услови. Температури од минус 40 степени не се реткост, а во текот на зимата деновите често се скратуваат на само неколку часа дневна светлина.

И покрај тоа, жителите на Вајтхорс и другите помали места се навикнати на таквото секојдневие. Градовите функционираат нормално и покрај снегот, училиштата и продавниците работат, а животот продолжува понатаму со јасни правила, добра опрема, подготовка и почит кон природата. Јукон воедно е познат и по недопрената дивина, северната светлина позната како аурора бореалис и силното чувство на заедништво меѓу луѓето.