Било да е премногу топло, студено или дождливо, кај нас секогаш може да се слушне некоја жалба за времето. Сепак, иако на нашите простори знае да е ладно и дождливо, всушност времето и не е толку лошо. Не се бориме со пеколната жега на Кувајт Сити, најтоплиот град на светот, каде температурите достигнуваат неподносливи 55°C, птиците буквално паѓаат од небото, а клима-уредите се поставуваат и на улиците.

Исто така среќа е што не живееме во најстудениот град на светот, каде температурата може да падне и до -64°C, а ризикот од промрзнување е постојан. Оваа ледена локација е Јакутск во Сибир, Русија. Градот е изграден на траен пермафрост, што значи дека земјата е засекогаш заледена. Ако тоа не е доволно, во зимските месеци градот има помалку од четири часа дневна светлина, а видливоста е многу слаба — помалку од пет метри.

Какво е времето во Јакутск?

Во Јакутск е неверојатно студено. Температурите се задржуваат длабоко под -20°C од ноември до февруари, а просечната декемвриска температура е -37°C. Температурата еднаш паднала на рекордни -64,4°C (февруари 1891), а во јануари 2023 градот имал најстудено време во последните две децении со -62,7°C.

За жителите сепак постои мало олеснување: веќе во април температурите почнуваат да се искачуваат над 0°C, а во јуни и јули може да достигнат и 40°C. Топлата сезона трае отприлика од мај до септември, додека најстудениот период е јануари. Со смртоносно ниските температури, се појавува и ледена магла, кога воздухот е толку студен што топлиот воздух воопшто не се ни крева.

Како луѓето издржуваат студ од -42°C?

Животот во најстудениот град на светот е голем предизвик, но жителите се приспособиле. Многу слоеви облека се задолжителни — термална облека, волнени штитници и чорапи од камилска волна за зглобови и стапала, поставени панталони, две јакни, шал, капа и традиционални ракавици и чизми кои ги штитат екстремитетите од смрзнување.

Кјун Б, која целиот живот го поминала во Јакутск, на ТикТок покажува како изгледа секојдневието и како се справува со суровите услови. Таа открива дека дури и кратка прошетка до продавница е огромен напор, па најдобро е да се вози автомобил. Сепак, поседувањето на автомобил е тешко бидејќи во текот на зимата луѓето мора да ги држат запалени во загреани гаражи за маслото и батеријата да не замрзнат.

Потребен е посебен вид автомобил со двојни стакла на шофершајбните, за да се спречи замрзнување при возење. Ако автомобилот се изгаси, не може да се користи до пролет. Затоа многумина се потпираат на јавниот превоз.

Ако мора да се излезе надвор, Кјун вели дека е тешко да се дише на тој студен воздух — еднаш дури почнала да плаче од студот, а солзите ѝ се претвориле во мраз.

Исто така, мобилните телефони не се практични — за користење треба да се симнат ракавиците, па повеќето жители едноставно избегнуваат нивно користење.

За среќа домовите во Јакутск се многу удобни. Повеќето згради имаат греење 24 часа, а влезовите се со две или три влезни врати за топлината да остане внатре. Поради пермафростот, куќите се градат на столбови за да не лежат директно на замрзнатата земја. Овие столбови не можат да издржат голема тежина, па во градот нема многу високи згради.