Одлуката ја образложила во популарен подкаст, што веднаш предизвика лавина од поделени реакции на социјалните мрежи.

Отпуштање поради афера

Натали Досон, коосновачка и претседателка на компанијата „Cardone Venture“, гостувала во подкастот „Diary of a CEO“ на британскиот претприемач Стив Бартлет. За време на разговорот, 32-годишната претприемачка открила дека двајца вработени ги отпуштила поради вонбрачна афера — и дека, како што вели, тоа би го направила повторно без никакво двоумење.

„Најмногу критики добив откако на ТикТок раскажав дека отпуштив вработен затоа што дознав дека ја изневерува својата партнерка, а и лицето со кое имаше афера исто така имаше партнер“, рекла Досон. „Штом тоа го дознав, веднаш ги отпуштив обајцата.“

Таа додала дека партнерите на отпуштените вработени не работеле во нејзината компанија, но одлуката била донесена моментално затоа што, како што вели, таквото однесување не сака да го толерира во својата работна средина.

Судир на мислења во студиото

Водителот бил изненаден од одлуката, напоменувајќи дека многумина би рекле дека приватниот живот на вработените „не е работа на работодавецот“. Досон возвратила дека не сака да навлегува во детали, но дека дел од инцидентот „се случил во контекст на работа“.

Сепак, таа истакнала дека би отпуштила вработен дури и ако аферата не била поврзана со работата. „Ако ја изневерува личноста со која треба да го помине животот, мислите ли дека нема да изневерува и на работа? Такво лице е товар за средината“, тврди таа.

Водителот не се согласил, нагласувајќи дека приватното и професионалното однесување често се разликуваат. „Луѓето во приватниот живот прават секакви работи. Не мислам дека тоа е моја работа“, рекла Бартлет. Досон останала на своето: „Апсолутно е моја работа. Тоа е иста личност која следното утро доаѓа на работа.“

Интернетот поделен

Снимката од расправата наскоро стана вирална со повеќе од 1,7 милиони прегледи и илјадници коментари. Мислењата, очекувано, беа поделени.

Некои го нарекоа нејзиниот потег „контролирачки“ и „срамотен“, со тврдење дека работодавците немаат право да се мешаат во приватниот живот на своите вработени. „Она што луѓето го прават надвор од работното време не е грижа на компанијата“, порачал еден корисник. Многумина ја доведоа во прашање и законитоста на таквото отпуштање.

Други, пак, ја поддржаа Досон, тврдејќи дека аферите внесуваат хаос на работното место. „Аферите внесуваат непотребен стрес, драма и разнишаност. Тоа многу зборува за карактерот на личноста“, напишал еден коментатор. Друг додал: „Кој изневерува приватно, ќе изневерува и професионално.“

„Ги штитам компанијата, не ги казнувам вработените“

Откако видеото експлодираше на интернет, Досон се огласила и на „LinkedIn“, порачувајќи дека отпуштањето не било казна, туку заштита на работната средина. „Како менаџери, одговорни сме за создавање средина во која луѓето можат да растат. Тоа вклучува интегритет, дури и кога е непријатно“, напиша таа, пренесува „New York Post“.

„Ако некој е неискрен во приватниот живот, таа неискреност не исчезнува во канцеларијата. Карактерот е ист. Ако толерирам непочит во едно поле, испраќам порака до сите останати.“

Заклучила дека отпуштањето не треба да се смета за табу. „Културата што ја градите зависи од тоа што дозволувате. Прашањето е: што толерирате во својата средина?“