Нејзиниот магичен брег, кањонот на реката Тара, најдлабокиот во цела Европа, Скадарското и Пивското езеро, заливот Бока Которска под заштита на УНЕСКО… Постојат бројни места што вреди да се посетат во оваа мала земја со само околу 620.000 жители, а овој пат ве водиме во Улцињ, најјужниот град на црногорскиот брег, сместен близу до границата со Албанија. Го красат многу долги и прекрасни песочни плажи и бистро и проѕирно море, поради што се нарекува врвен туристички рај на Јадранот.

Неговите ѕидини се простираат на површина од дури три хектари и изгледаат импресивно

Самиот град е стар повеќе од 2.000 години, а првите населби во областа наводно ги основале Илирите. Улцињ го добил своето изворно име Колхиниум (Kolchinium) од Колхијците, античко племе од грчко потекло. Денес таму живеат околу 20.000 луѓе, а доколку сакате да дознаете повеќе за историјата на овој црногорски бисер, ви препорачуваме да започнете од импресивниот стар дел од градот.

Окружен е со масивни, таканаречени циклопски камени ѕидини, кои се протегаат на површина од дури три хектари. Цитаделата, односно горниот дел од градот и тврдината од воен карактер, се наоѓаат на највисокото камено плато, од каде има фантастичен поглед на целата околина.

Големиот шпански писател Мигел де Сервантес бил роб на улцињските пирати

Се верува дека стариот град го изградиле Грците од Епир кон крајот на 5-ти и почетокот на 4-ти век п.н.е. додека самиот Улцињ, односно неговото пристаниште, некогаш бил познато пиратско засолниште. Во 17 век, трговијата со робови кои биле заробени од страна на улцињските гусари цветала во градот. За тоа сведочи фактот дека главниот плоштад во Улцињ некогаш се нарекувал Плоштад на робовите.

А тука е и приказната за познатиот шпански писател Мигел де Сервантес, за кој се верува дека во младоста бил роб на улцињските пирати. Дури и неговото литературно дело „Дон Кихот“ е поврзано со неговото затворање во овој црногорски град, каде што наводно поминал полни пет години. Некои истражувачи ја препознале Дулчинеја, главната хероина од гореспоменатиот роман, како жена од Улцињ.

Во музејот постојат секири од бронзено доба, држач со натпис на божицата Артемида

Стариот град бил уништен од земјотрес во 5 век, а сегашниот изглед на Улцињ, кој е споменик од прва категорија и кандидат за заштита на УНЕСКО, му го дале Римјаните, кои го изградиле новиот град во 6 век. Во Улцињ се влегувало низ две градски порти, едната од морето, а другата од копното.

Денес, во стариот град се наоѓаат црква, џамија и музејски комплекс, каде што, меѓу другото, можете да видите антички држач со грчки натпис на божицата Артемида, две секири од бронзеното доба, јонски капител, делови од цибориум од Малата црква од 9 век, предмети од османлиската ера.

Гробница која датира од османлиската ера станала своевидно светилиште

Во близина на музејот се наоѓаат турска чешма од 1749 година и Балшиќ кула, чии три страни гледаат кон морето. Тоа е една од најрепрезентативните градби на средновековната архитектура во Црна Гора, а денес во неа се наоѓа галерија. Од историските споменици, секако вреди да се спомене палатата Венеција, која некогаш била резиденција на венецијанскиот управник на Улцињ, а подоцна се користела како двор.

Пред да влезете во стариот град, ќе најдете и гробница од османлиска ера. Според легендата, двајца мажи се бореле за љубовта на една жена, но таа не само што не можела да се одлучи, туку не сакала ниту да го гледа нивниот дуел, па се самоубила. Двајцата млади мажи продолжиле да се борат до смртта, а нивната гробница на крајот станала своевидно светилиште. Многу жители на Улцињ, како и туристи, кога минуваат низ Стариот град, фрлаат паричка за среќа во гробницата која сега е оградена со решетки.

Вештачкиот остров Ада Бојана го окружуваат реката Бојана и Јадранското море

Во прекрасниот Улцињ ќе видите и многу џамии. Пашина, изградена во 1719 година е единствената во земјата со турска бања која сè уште е функционална. А во самиот центар се наоѓа џамијата Намазѓах со часовна кула од 19 век, до која гордо стои џамијата Брегут, најголемата во градот.

Од природните убавини, убедливо најпозната е Ада Бојана, вештачки остров во триаголна форма, чии две страни ги заплискува реката Бојана, а третата Јадранското Море. Создадено е во 19 век на местото каде што се насукал бродот Мерито од Трогир. Години таложење на речните наноси ја обликувале Ада Бојана, која денес е позната како вистински мал нудистички рај.

Големата плажа со најфин песок е најдолга на Јадранот

Ова место воодушевува со своите долги песочни плажи. Покрај пливањето, таму можете да уживате во јавање коњи, едрење, параглајдинг и други спортски активности. Бреговите на Ада Бојана се познати и по своите шармантни дрвени куќи, чии сопственици ловат риба на традиционален и специфичен начин, исто како што правеле и нивните предци. Секако, можете да го вкусите истото во бројни ресторани низ градот.

А потоа тука е таканаречената Голема плажа (Велика плажа), најдолга на целиот Јадран со најфин песок. Се протега 13 километри и е идеална за кајтсурфинг.

Вредноста на маслиновото масло од овој регион се изедначувала со злато

Во овој град има и 80.000 маслинови дрвја. Повеќето од нив се стари околу 300 години, а се верува дека некои дури датираат од времето на античка Грција.

Имено, во овој дел од Црна Гора, маслинките отсекогаш биле стока чија вредност била еднаква на златото, а улцињското маслиново масло во амфори и бокали патувало по трговските патишта до Венеција, Рим, Каиро, Скадар, Скопје, Призрен…