Египет завчера ја отвори гробницата на фараонот Аменхотеп III за посетители по повеќе од две децении реставрација.
Генералниот секретар на Врховниот совет за антиквитети на Египет изјави дека гробницата е дел од трофазен проект за реставрација предводен од јапонски експерти. Сликите на фараонот и неговата сопруга на ѕидовите од гробницата исто така биле реставрирани.
Големата гробница на Аменхотеп, кој владеел со древен Египет помеѓу 1390 и 1350 година пр. н. е., се наоѓа на западната страна од Долината на кралевите. Откриена е во 1799 година, а нејзината содржина е ограбена, вклучувајќи го и саркофагот.
Гробницата започнува со премин долг 36 метри и длабок 14 метри што се спушта. Вклучува главна гробница за кралот и две комори за неговите сопруги, кралиците Тиа и Ситамун.
За разлика од другите гробници во Долината на кралевите, таа не е целосно украсена. Сликите во неа го прикажуваат Аменхотеп III со група египетски богови. Сцени од Книгата на мртвите, збирка амајлии за непречен премин на мртвите низ подземјето кон задгробниот живот, се врежани во погребната комора.
Инаку гробницата се отвори за посетители помалку од еден месец пред официјалното отворање на Големиот египетски музеј во близина на пирамидите во Гиза.
