Американскиот град Њу Орлеанс би можел да стане првата жртва на зголемувањето на нивото на океанот, а експертите предупредуваат дека градските власти мора веќе да го започнат процесот на преселување на жителите, со цел да се избегне хаос, пишува Си-ен-ен.
Крајбрежниот дел на Луизијана е еден од најниските региони во светот, а Њу Орлеанс, град со 360.000 жители, е особено изложен на ризици. Се наоѓа во слив во облик на чинија, претежно под нивото на морето, во средината на брзо намалувачка делта.
Градот е речиси целосно опкружен со мочуришта, кои дејствуваат како заштита од урагани и бури, но тие брзо исчезнуваат бидејќи луѓето ги испуштаат поради урбаниот развој, копаат канали во нив за нафтената и гасната индустрија и градат речни насипи, со што ги лишуваат од седименти што ги спречуваат да тонат.
Од 1930-тите, Луизијана изгуби околу 5.000 квадратни километри мочуришта.
Крајбрежниот дел на Луизијана се соочува со зголемување на нивото на морето од околу три до седум метри, според анализа објавена во мај во списанието „Нејчр састејнабилити“.
Последиците од ова зголемување ќе бидат мрачни, а околу 75 проценти од преостанатите мочуришта ќе бидат изгубени, па затоа брегот би можел да се помести кон внатрешноста до сто километри, предупредија научниците.
Регионот „ја помина точката од која нема враќање“, истакнаа авторите на студијата, додавајќи дека Њу Орлеанс би можел да се најде опкружен со Мексиканскиот Залив пред крајот на овој век.
Тие тврдат дека градот мора да ја искористи можноста да развие стратегии за преселување што би можеле да го направат модел за местата што се соочуваат со слична судбина.
Покачувањето на нивото на морето ќе влијае на крајбрежните градови и места низ целиот свет, од Њујорк и Лондон до Бангкок и Шангај.
За да ја мапираат иднината на Луизијана, научниците го истражуваа нејзиното минато, а еден од авторите на студијата идентификуваше древен брег на околу 50 километри северно од Њу Орлеанс, кој е формиран пред околу 125.000 години кога температурите биле слични на денешните, но океаните биле најмалку три метри повисоки.
„Многу е веројатно дека нивото на морето ќе се искачи на тоа ниво во иднина“, рекол авторот на студијата Торбјерн Торнквист, кој е професор по геологија на Универзитетот Тулан.
Луѓето веќе ги напуштаат крајбрежните области на Луизијана и тоа го прават со децении, рече Бријана Кастро, авторот на студијата и доцент по урбана одржливост на Јеилското училиште за животна средина.
Откако ураганот Катрина ја погоди Луизијана во 2005 година, при што загинаа речиси 1.400 луѓе, Њу Орлеанс изгуби околу 25 проценти од своето население.
Приближно 99 проценти од населението на Њу Орлеанс е изложено на висок ризик од поплави, покажа неодамнешна студија.
Доколку процесот на преселување не се управува внимателно, тоа би можело да доведе до „хаотично“ напуштање на градот, што ќе има висока цена, особено за најсиромашните во градот, според авторите на студијата.
„Засега, се чини дека нема голема желба кај креаторите на политиките навистина да почнат да размислуваат за преселба“, признал Торнквист.
Екстремната ранливост на брегот на Мексиканскиот Залив дава увид во она што може да ги очекува другите крајбрежни заедници во текот на овој век.
„Морето би можело да го проголта земјиштето овде порано отколку на други места, но она што се случува овде сега е она што ќе се случи и на други места“, заклучил Торнквист.
