Извршниот директор на „OpenAI“, Сем Алтман, изјави во вторникот дека брзиот развој и пошироката примена на вештачката интелигенција нема да доведат до глобална „апокалипса на работните места“, додавајќи дека технологијата досега не елиминирала толку многу канцелариски работни позиции колку што претходно очекувал.
Говорејќи преку видео-врска на конференцијата на „Commonwealth Bank of Australia“ во Сиднеј, Алтман рече дека на почетокот бил загрижен за можниот ефект на вештачката интелигенција врз глобалното вработување.
Тој наведе дека тој и неговите соработници биле „главно во право“ во техничките предвидувања кога „OpenAI“ во 2022 година го лансираше „ChatGPT“, но дека тогаш „прилично погрешиле“ во проценката на општествените и економските последици.
„Мило ми е што погрешив во врска со ова. Мислев дека досега ќе има поголемо влијание врз почетните канцелариски работни места отколку што навистина се случи – изјави Алтман во разговор со извршниот директор на „Commonwealth Bank of Australia“, Мет Комин.
Тој додаде дека сега подобро разбира зошто такво сценарио не се остварило целосно, нагласувајќи дека и понатаму станува збор за област што носи ризици
Алтман истакна дека, иако вештачката интелигенција презема сè поактивна улога во различни индустрии, постои „човечки дел“ од работата што не може да биде заменет со технологија.
Како пример го наведе сопственото искуство со користење AI алатки за одговарање на „Slack“ и е-пошта пораки, но рече дека повторно се вратил на рачно одговарање на дел од комуникацијата.
„Го натерав да одговара на пораките со зборовите „ова е AI верзијата на Сем“, и тоа беше јасен пример дека навистина се грижиме за човечката интеракција“, изјави Алтман.
Тој додаде дека би му било тешко целосно да ја препушти таквата комуникација на вештачката интелигенција, и покрај тоа што таа му заштедува време.
Алтман наведе дека тоа искуство му го променило погледот кон иднината на пазарот на трудот и дополнително го зацврстило неговото уверување дека структурата на вработување нема да се развива во насока на „апокалипса на работните места“ каква што некои предвидуваат.
Неговите изјави доаѓаат во момент кога сè поголем број глобални компании, вклучувајќи ги „HSBC“, „Amazon“ и „Standard Chartered“, како и „Commonwealth Bank of Australia“, воведуваат AI системи кои преземаат дел од работните задачи.
„OpenAI“, според претходни извештаи, се подготвува за доверливо поднесување барање за излегување на берза во САД, со потенцијална проценка на вредноста на компанијата до еден билион долари и планирано прибирање најмалку 60 милијарди долари капитал, пренесува „Reuters“.
