Една тиктокерка од Босна и Херцеговина, која живее во Шведска и споделува снимки под профилот „@gabbzziii“, објави вирално видео од чевли што ги видела во една продавница во Шведска, со што предизвика бројни реакции на следбениците од Балканот.
„Опинци за 150 евра“
Имено, таа ги снимила чевлите што ги видела на полиците, кои многу наликуваат на традиционалните опинци, а чинат 150 евра. „Опинци за 150 евра, најнова мода“, рече таа.
„Додека ние на Балканот се срамиме од нашите селски опинци, во Шведска тие се најновиот моден тренд, 150 евра, па дури и се достапни во портокалова боја“, рече тиктокерката во видеото.
За што всушност станува збор?
Иако чевлите наликуваат на гумени опинци, тие всушност се машки гумени галоши од норвешкиот бренд „Swims“, кој е специјализиран за модерни и функционални обувки.
Овој вид обувки всушност служи како водоотпорна заштита што се носи преку класичните машки чевли со цел заштита од дожд и нечистотија. Официјалната веб-страница на брендот покажува како галошите се облекуваат преку чевлите, овозможувајќи зачувување на деловниот изглед дури и во лоши временски услови.
Галошите се достапни во портокалова, црна, темносина и маслинесто зелена боја, а цените се движат од околу 80 евра, односно 900 норвешки круни.
„Сè правевме први“
Инаку видеото на тиктокерката предизвика бројни коментари. „Бевме модерни, без да бидеме свесни за тоа“, „Сè правевме први“, „Баленсијага лансира гумен опинок, а цената е 3000 евра“, беа дел од коментарите.
