И додека едни се колнат во нејзината ефикасност, други потсетуваат дека таа е забранета за употреба во Данска.

Адаптогените билки се специфични растенија кои му помагаат на организмот подобро да се справи со стресот, уморот и анксиозноста. Тие делуваат на хормоналниот систем, особено на функцијата на надбубрежните жлезди, помагајќи му на телото да остане во рамнотежа. Не делуваат само на симптомите туку и на причината за проблемот, зајакнувајќи ја отпорноста на организмот на стрес.

Најпознати адаптогени, покрај ашвагандата, се и родиола, сибирски женшен и реиши габа.

Зошто е забранета во Данска?

Во април 2023 година, Данска ја забрани ашвагандата во додатоци за исхрана, повикувајќи се на извештај од Данскиот технички универзитет (DTU) од 2020 година, кој укажува на ризици вклучувајќи можни негативни ефекти врз хормоните на тироидната жлезда и половите хормони, плодноста, како и потенцијални абортивни својства, поради што не е можно да се одреди безбедна доза.

Прегледот на достапни податоци покажува дека кај глодарите ашвагандата може да го намали квалитетот и количината на сперматозоиди, додека кај луѓето може да го зголеми нивото на хормони на тироидната жлезда – што во ретки случаи може да доведе до тиреотоксикоза.

Сепак, податоците за нејзиното влијание врз хормоните и плодноста се нејасни, а многу студии не покажале никакви проблеми со тироидната жлезда.

Кога станува збор за бременост, нема клинички докази дека ашвагандата предизвикува абортус. Препораката да се избегнува во текот на бременоста и доењето потекнува од ајурведски извори. Некои научни трудови сугерираат дека таа е безбедна и може позитивно да влијае на здравјето пред и по породувањето. Но, Данска од претпазливост, одлучи целосно да ја забрани оваа билка.

Што е всушност ашваганда?

Ашвагандата потекнува од плодот и коренот на грмушка која традиционално расте во Индија, а подоцна се проширила и на Блискиот Исток. Во ајурведската медицина, стара над 4000 години, има истакнато место.

Придобивките кои ѝ се припишуваат се многу разновидни: таа наводно има антиканцерогени, антиинфламаторни, антиоксидативни, антифунгални, анксиолитички, имуномодулаторни и невропротективни својства.

Најчесто се користи за намалување на стресот, а неколку научни истражувања потврдуваат дека може да го намали нивото на кортизол во крвта и до 25%. Исто така, помага при несоница, умор и недостиг на концентрација.

Кога и колку да се зема?

Кога да се користи билката зависи од ефектите што сакаме да ги постигнеме во одреден момент. Доколку треба да му обезбедиме на нашето тело мир и рамнотежа или доколку имаме проблеми со несоница, треба да се зема навечер. Пред спиење, ќе нè опушти и ќе ни помогне да заспиеме. Меѓутоа, доколку целта е зголемување на енергијата и подобрување на концентрацијата, треба да се зема наутро, на празен стомак, а тоа ќе ја зголеми нашата виталност.

Доколку се зема во форма на прав, измешан со вода или млеко, се препорачуваат 1-2 лажички дневно. Течниот екстракт има позабележителен и побрз ефект.