Откако се врати во Белата куќа во јануари, Трамп ја нападна имиграцијата, а некои од неговите потези се насочени кон ограничување на одредени форми на легална имиграција во САД. Најавената реформа на програмата за визи H-1B е најзначајниот обид на администрацијата на Трамп да го ревидира системот за привремени работни визи досега.

„Ако ќе обучувате луѓе, тоа ќе бидат луѓе кои неодамна дипломирале на еден од најголемите универзитети низ нашата земја. Обучете ги Американците. Престанете да носите луѓе кои ни ги земаат работните места“, рече министерот за трговија Хауард Лутник.

Некои работодавци ја искористија програмата за привремени работни визи за да ги намалат платите, штетејќи им на американските работници, според извршната наредба потпишана од Трамп во петокот.

Бројот на странски работници во областите на науката, технологијата, инженерството и математиката (STEM) во САД се зголеми повеќе од двојно од 2000 до 2019 година, на речиси 2,5 милиони, додека вкупната вработеност во STEM се зголеми за само 44,5 отсто во истиот период, се вели во документот.

Технолошкиот сектор под удар

Цената на една виза, која ќе важи три години, ќе биде 100.000 долари годишно, рече Лутник, додавајќи дека владата сè уште ги „разработува“ специфичните детали за тоа како ќе се спроведуваат таксите.

Новите такси би можеле да додадат милиони долари на трошоците на компаниите, особено силно погодувајќи ги помалите технолошки компании, забележува Reuters.

Некои аналитичари предвидуваат дека воведувањето на данокот би можело да ги принуди некои компании да преместат дел од својот бизнис со висока вредност во странство и следствено да ги попречи САД во трката за првото место во секторот за вештачка интелигенција.

Најголем број привремени работни визи, дури 71 отсто, им беа доделени на работници од Индија минатата година, додека кинеските државјани се на второто место, со удел од 11,7 отсто, според официјалните податоци од САД.

Во однос на бројот на доделени визи, технолошките компании се водечки. На „Amazon“ му беа доделени 12.000 апликации за привремени работни визи во првата половина од 2025 година, додека „Microsoft“ и „Meta Platforms“ добија по 5.000 вакви визи.

Латник во петокот изјави дека сите големи компании се согласуваат со воведувањето на новата давачка.

Многу големи американски технолошки, банкарски и консултантски компании одбија да коментираат за ситуацијата или не одговорија веднаш на барањето на Reuters за коментар, а ниту индиската амбасада во Вашингтон, ниту кинескиот генерален конзулат во Њујорк не одговорија.

Прашање за легалноста

„Конгресот ја овласти владата само да наметнува такси за трошоците за одлучување по апликациите“, изјави за Блускај Арон Рајхлин-Мелник, директор за политика во Американскиот совет за имиграција, доведувајќи ја во прашање легалноста на новата такса.

Програмата H-1B им нуди на работодавците 65.000 визи годишно за да донесат привремени странски работници во специјализирани области и уште 20.000 визи за висококвалификувани работници.

Според сегашниот систем, постои мала такса за учество во лотаријата за визи и такса од неколку илјади долари ако визата биде одобрена.

Речиси сите такси за визи мора да ги плати работодавецот. Визите H-1B се доделуваат за период од три до шест години.

Во петокот, Трамп потпиша и извршна наредба со која ќе им се овозможи на странските државјани да платат милион долари за „златнa карта“ што ќе им овозможи трајно да живеат во Соединетите држави.