Светското првенство во атлетика, кое се одржува во Токио, од ден на ден носи возбудувања, неизвесност, емоции, рекорди и сè она што ја прави атлетиката „кралица на спортовите“.
Нова сцена за историја се случи на трката во брзо одење на 20 километри, каде што златниот медал го освои Бразилецот Кајо Бонфим.
Тој ја заврши трката со време од еден час, 18 минути и 35 секунди. Веднаш зад него беше Кинезот Џаоџао Ванг, осум секунди побавен, додека бронзата ја освои Шпанецот Пол Мекграт со резултат 1.18.45.
Откако Бразилецот и нов светски шампион ја мина целта, следуваа сцени исполнети со неверојатни емоции. Кајо Бонфим физички и емотивно се скрши по триумфот. Лежеше на патеката, прекриен со лентата за цел, а потоа заплака. Толку беше исцрпен што подолго време не можеше да стане.
Во тој момент му пријде сонародникот Матеуш Кореја, кој исто така настапуваше во оваа дисциплина и ја заврши трката со време 1.21.04 – речиси две и пол минути подоцна од шампионот.
Кореја го подигна новиот светски првак и го понесе во прегратка, додека Бонфим плачеше од радост поради освоениот златен медал.
+
