Од сабота, обожавателите и истражувачите заинтересирани за покојната британска музичка легенда ќе можат да видат околу 90.000 предмети со закажување во Центарот Дејвид Боуви во „V&A East Storehous“  во источен Лондон.

Прославен како „камелеон“ на рок-музиката за постојано редефинирање на својата уметничка личност, Боуви се пробиваше низ световите на музиката, модата, драмата и уметноста, оставајќи зад себе огромна колекција предмети што опфаќаат пет децении. Почина од рак во 2016 година на 69-годишна возраст, само два дена по објавувањето на неговиот последен албум, „Blackstar“.

Над 70.000 фотографии, костими, инструменти…

Кураторите рекоа дека архивата вклучува 70.000 фотографии, 400 костими, 150 музички инструменти и лични тетратки. Посебна изложба од 200 предмети, исто така, ја истражува креативноста на Боуви.

„Исто така, имаме изложби кои ја покажуваат еволуцијата на Боуви како мултидимензионален креативец и зборуваат за неговото трајно влијание врз популарната култура и како уметници како Боуви ја трансформираат креативната пракса и имаат моќ да ги променат нашите светови“, изјави за Ројтерс главната кураторка Мадлен Хадон, опишувајќи го уметникот како „вистински полимат“.

Архивата, исто така, содржи идеи што Боуви ги запишал на лепливи ливчиња, пронајдени во неговата канцеларија во Њујорк по неговата смрт, за потенцијален мјузикл од 18 век наречен „Спектатор“, на кој работел кон крајот на својот живот.

Идеите за мјузиклот се извлечени од личности од ерата, вклучувајќи го сликарот Вилијам Хогарт и лондонскиот крадец Џек Шепард.

„Можеме само да шпекулираме за тоа какви биле неговите конечни идеи за тој проект“, рече Хариет Рид, кураторка на современи перформанси во музејот Викторија и Алберт. „Тоа е навистина фасцинантен поглед на тоа како Боуви работел како уметник, но и како човечко суштество“, рече Рид за архивата. „Може да послужи како „инспирација за сите“, додала таа.