37-годишен Хрват преку интернет пронашол оглас за продажба на автомобил. Купувањето го договорил со непозната жена, но кога го донел возилото дома, открил дека е украдено. Хрватската полиција сè уште трага по непознатата измамничка.
Осиечката полиција трага по жена која измамила 37-годишен маж од Белишќе за речиси 20.000 евра, откако му продала украден автомобил со фалсификувана документација, соопштија од полицијата.
На почетокот на годината, 37-годишникот решил да купи автомобил во Германија што го пронашол преку интернет оглас, по што купувањето на возилото во вредност од 19.700 евра го договорил со непозната жена.
По склучувањето на купопродажниот договор и плаќањето, тој го донел автомобилот во Хрватска. Сепак, набргу по проверката на податоците било утврдено дека возилото е украдено, а документите се фалсификувани, поради што автомобилот бил одземен, а на 37-годишникот му била издадена потврда за привремено одземање.
Полицијата и понатаму трага по непознатата измамничка.
