Според сведоштвата и искуствата на луѓето, утро започнато со пријатни ритуали има јасно позитивно влијание врз менталното здравје. Токму затоа, терапевтите велат дека „здравата и фокусирана утринска рутина, без стрес, го поставува тонот на целиот ден“

Целта на утринските рутини е да го намалиме стресот и да почувствуваме мир

Креирањето утринска рутина може да биде спасоносна пракса и за вас и за вашето семејство. Може да создаде позитивен начин на размислување кој ќе ви помогне подобро да се справите со промените и неизвесноста што ги носи новиот ден. Започнувањето на денот со кратка утринска рутина за подигнување на расположението (која со тек на време ќе стане навика) го трасира темпото по кое ќе се движите низ остатокот од денот. Суштината на овие рутини е да го намалат стресот и да донесат мир, заменувајќи ја реактивноста со проактивност, бидејќи подоброто ментално здравје води кон оптимално физичко здравје.

Кога ќе ги „автоматизираме“ нашите утра, редовно придржувајќи се до некои навики и постепено развивајќи нови, таквото однесување брзо почнуваме да го доживуваме како природно. Токму ова редовно следење на утрински навики може да ни го олесни поставувањето приоритети во текот на остатокот од денот.

Три утрински рутини за мирен почеток на новиот ден

Идеалната утринска рутина не е иста за сите. Ако сте родител, на пример, јасно е дека вашата рутина ќе биде сосема различна од некој што живее сам или со родителите. За да ги спроведете малите утрински навики што ќе ви помогнат да се ослободите од стресот во текот на денот, потребно е да станете порано од децата за да имате време само за себе. Најважно за успехот е – доследноста. Терапевтите издвојуваат три утрински рутини кои можат да помогнат денот да не започне хаотично:

Средување на креветот

Да, средувањето на креветот е еден од наједноставните начини да се почувствуваме подобро. Причините се многубројни – просторот, а со тоа и умот, изгледаат помалку натрупани, се поттикнува добра хигиена на спиење (кога на крајот од денот ќе се вратите во среден кревет) и оваа активност може да предизвика и изненадувачки психолошки ефект „во позадина“. Се вели: „Ако го наместите креветот секое утро, ќе ја завршите првата задача во денот.“ Тоа ќе ви даде малку чувство на гордост и задоволство и ќе ве поттикне да завршите уште една задача, па уште една… така што до крајот на денот ќе имате завршено многу работи. Искусните сведочат дека редовното средување на креветот им помогнало да го одржуваат уреден остатокот од просторот, што позитивно се одразило на нивното ментално здравје. Велат дека не ни сфаќале колку таа пракса ги „приземјувала“ и им служела како насока за други добри навики.

Направете листа на дневни обврски

За некои луѓе, идеалното утро е како некаков „заштитен меур“ во кој нема работа. За други, утрото е идеално време да направат листа со дневни обврски додека пијат чај, кафе, сок или топла лимонада. Кога ќе издвоите време наутро да ја запишете или прегледате дневната агенда, стекнувате предност – вашите одлуки нема да зависат од моменталното расположение. Креирањето „TO DO“ листа на почетокот од денот е одлично за продуктивноста, велат терапевтите. Ако не го избереме свесно каде ќе ја насочиме својата енергија и време, други луѓе – шефови, колеги, клиенти или семејството – ќе изберат наместо нас, а ние ќе изгубиме од вид што ни е навистина важно. Ако имате време, добро е покрај листата на обврски да запишете и неколку реченици за тоа како се чувствувате. Запишете сè што ви паѓа на ум – тоа создава посилна врска со сопствените емоции.

Испијте чаша или две вода

Без разлика дали прво што ви треба наутро е кафе, цеден сок, чај или топла вода со лимон (која освежува и го стимулира варењето), не заборавајте да пиете и обична вода. Многу научни студии ги документираат придобивките од водата веднаш по будењето. Чаша или две вода наутро го започнува процесот на хидратација на телото – не само физиолошки, туку и ментално. Хидратацијата е важна за продуктивен ден, затоа не дозволувајте да се сетите дека не сте пиеле вода дури напладне. Се сеќавате како некогаш луѓето покрај креветот чуваа чаша вода покриена со мал везен милје? Таа чаша им служела за да внесат вода веднаш по будењето. Чаша вода наутро има многу бенефити за телото и умот, а еве некои од нив:

• Рехидратација на телото

За време на спиењето не внесуваме течности, па телото природно се дехидрира. Чаша вода помага брзо да се надомести изгубената течност.

• Разбудување на метаболизмот

Водата го стимулира варењето и може да го забрза метаболизмот до 30% во наредниот час, што е корисно ако сакате да ја одржите или намалите телесната тежина.

• Детоксикација

Водата им помага на бубрезите поефикасно да ги исфрлат токсините наталожени преку ноќ.

• Помош за варењето

Ја подготвува дигестивниот систем за појадок и може да помогне за редовно празнење на цревата.

• Подобра концентрација и енергија

Дехидратацијата, дури и блага, негативно влијае на мозочните функции како внимание, меморија и расположение. Водата помага мозокот побрзо да се „разбуди“.

• Поздрав изглед на кожата

Хидрираната кожа изгледа посвежо, поеластично и помалку уморно. Водата наутро придонесува за тој сјај одвнатре.

• Намалување на чувството на умор и главоболка

Дехидратацијата е чест предизвикувач на утрински главоболки – една чаша вода може да ги спречи или ублажи.