Возењето на резерва можеби изгледа безопасно кога ви се брза или кога мислите дека „имате уште за десетина километри“, но оваа навика може сериозно да му наштети на вашиот автомобил. И тоа не е единствен ризик – покрај можноста да останете заглавени сред пат, последиците може да бидат многу поскапи одошто мислите.

Ниски резерви, високи трошоци

Во моментот кога ќе се запали ламбичката за резерва, горивото во резервоарот веќе не стигнува во моторот под идеален притисок. Пумпата за гориво почнува да влече не само течност, туку и нечистотии, талог и потенцијално влага од дното на резервоарот. Тоа може да доведе до затнување и оштетување на системот за гориво.

Како да се избегне оваа навика

Експертите препорачуваат нивото на гориво во резервоарот никогаш да не падне под една четвртина. Така не само што се продолжува животниот век на пумпата и останатите компоненти, туку и се намалува ризикот од оштетување на моторот. Дополнително, полн резервоар го намалува просторот за создавање кондензација, особено при ниски температури.

Иако цените на горивото варираат и секое полнење може да изгледа како удар по буџетот, трошокот за замена на пумпата или чистење на системот е повеќекратно повисок. Возењето со стабилно ниво на гориво не е луксуз – тоа е прашање на безбедност и грижа за возилото.

Возење „на црвено“ не е заштеда, туку тивка штета

Затоа, следниот пат кога ќе помислите дека можете уште неколку километри „на ламбичка“, сетете се дека вашата пумпа за гориво можеби веќе влече нешто што не треба. А ако автомобилот ве изневери токму кога најмногу ви се брза, таа „заштеда“ од неколку литри ќе ве чини многу повеќе отколку што сте планирале.