Легендарната хрватска пејачка Габи Новак почина на 89-годишна возраст, пренесе Јутарњи лист.
Последните месеци од животот Габи ги поминала во дом за рехабилитација, каде престојувала поради повреда на рбетот.
Јавноста имаше можност да ја види во јуни, кога се појави на погребот на нејзиниот син, Матија Дедиќ, кој почина на 8 јуни на 53 годишна возраст.
Новак е родена во 1936 година во Берлин, каде го поминала детството, а на почетокот од Втората светска војна семејството се преселило на Хвар.
Во Загреб дипломирала на Факултетот за применети уметности, насока графика. Работела како аниматор во Загреб филм, во студиото за цртан филм.
Нејзините вокални способности ги забележал Бојан Адамич и ја поканил да гостува на концертите на „Биг Бенд“ во Љубљана. Таа ја отпеала песната „Сретан пут“ од филмот „Х-8“. Набрзо настапила на Загребфест со песната „Љубав или шала“. На Бледскиот џез фестивал во 1958 година, таа отпеала дует со Луис Армстронг.
Во 1964 година, Новак добила понуда да пее на западниот пазар, но се откажала од неа, бидејќи не сакала да се согласи на промена на изгледот и други услови.
Инаку Габи внимателно ги избирала песните и ги пеела само оние што ѝ се допаѓале. Се омажила за Стипица Калоѓера, но се развеле по неколку години.
Во 1970 година, стапила во втор брак со Арсен Дедиќ, а три години подоцна го родила синот Матија Дедиќ.
Габи ја доби наградата Порин за најдобра женска вокална изведба за албумот „Пјесма је мој живот“ во 2003 година и за посебен придонес во хрватската забавна музика во 2006 година.
