Историјата на кафе-книжарниците датира од 16. век, кога првиот ваков објект бил отворен во Истанбул во 1555 година, според „Википедија“. Модата на читање книги со кафе брзо се проширила низ Европа, а потоа и низ целиот свет.

Денес кафе-книжарниците се места каде што се продаваат книги, но и уметнички предмети, каде што се служи кафе, но и коктели, каде што можете да изедете вкусен колач и едноставно да уживате во мир.

Светските метрополи како Њујорк веќе со години го спојуваат уживањето во пиењето кафе или чај со страста кон книгите, пишува Nova.rs.

А како е во нашиот дел од светот? И кај нас постојат вистински хедонистички места каде што, со шолја од омилениот напиток, можете во мир да уживате во пишаниот збор.

Во продолжение погледнете ги најубавите кафе-книжарници на Балканот.

Штрик, Белград

Штрик кафе-книжарницата на Влајковићева 7 е „ушушкано“ место каде што можеш да учиш, работиш, да се изолираш, да поминеш време со пријатели или со твоите миленици.

Можеш да испиеш одлично кафе, чај, лимонада или некој друг напиток по избор, а покрај сето тоа да ја пронајдеш и својата следна приказна во некоја од книгите.

Зенит Букс, Нови Сад

Зенит на Његошева 24 во Нови Сад е замислен како спој на книжарница и место каде што културата има примат.

Тука можете да уживате во локална храна, квалитетни пијалаци, но и во слушање жива музика. Книгите се составен дел од овој простор кој зрачи со урбана атмосфера.

На ова место можете да ги прочитате најдобрите книги по препорака, но и да одберете оригинален подарок од работилниците на домашни дизајнери.

Букса, Загреб

Букса е физички и онлајн простор посветен на книжевноста во сите нејзини форми и појави, како и на сите кои ја сакаат книгата.

Во Букса преку ден се дружи, чита, работи, разговара, пие кафе, разменуваат искуства (и понекој трач), се релаксира, преговара, договара и уште малку чита.

Навечер се одржуваат различни програми – книжевни, музички, патописни, активистички, но и други, поразлични…

Тука се и работилниците за креативно пишување проза и поезија, читателски клубови, работилница за уметнички фотографии…

Буква, Скопје

Кафе-книжарницата Буква во Скопје се наоѓа во самиот центар на градот, но дворот и зеленилото создаваат мирна и релаксирана атмосфера.

Ентериерот е од отворен тип, поделени се две зони — едната е наменета за изложување книги и содржи отворен пулт за подготовка на кафе, додека во другата се наоѓаат маси и столчиња.

Пијте кафе сами или во друштво, завршете го започнатиот проект на лаптоп или најдете добро четиво за лето и есен – сè на едно место.

Азил, Љубљана

Азил Bookshop Cafe се наоѓа на плоштад опкружен со прекрасни барокни згради, кои токму од ова кафуле можете да ги набљудувате и однатре.

Азил е претежно академска книжарница, па нема да најдете многу трилери или романи, но затоа можете да уживате во прекрасната атмосфера.

Сè на сè, тоа е совршено место да направите пауза од разгледувањето и да ги поттикнете мозочните вијуги.

Итака, Подгорица

За оваа кафе-книжарница велат дека е најдобро скриеното место во Подгорица – два во еден.

„Itaka Library Bar“ е совршено место за утринско или дневно кафе, а попладне и навечер свратете на коктел, опуштете се и уживајте во музиката.

Овој пријатен простор ја комбинира атмосферата која потсетува на библиотека со живописен социјален амбиент, што го прави совршена дестинација за туристи кои сакаат да се опуштат по ден поминат во разгледување на градот.

Декорот е еклектична мешавина од полици полни со книги, удобни места за седење и топло осветлување кое создава пријатна и гостопримлива атмосфера.

Без разлика дали сте свратиле за брзо кафе или сте се задржале на коктел, тука ќе најдете амбиент одличен и за одмор и за разговор.

Бајбук, Сараево

Книжарско-издавачката куќа Бајбук е основана во 1996 година и денес е една од најзначајните книжарници во Босна и Херцеговина, како и високо ценета и препознатлива во регионот како единствен бренд.

Книжарницата се наоѓа на Радиќева улица во Сараево и на посетителите им нуди голем избор на домашни и странски наслови, како и пријатно катче за читање и опуштање.

во кафе-книжарниците луѓето склучуваат бизниси, пишуваат нешто, прават селфи со пријателите или со омилениот писател, или читаат некоја книга, а овие места можат да станат и повод за малку поинакво патописно патување.