Дијана Монтано, 25-годишна девојка која била мета на негативни коментари поради врската со маж кој е 51 година постар од неа, проговори за нивната врска. Таа раскажала дека не барала љубов кога го запознала 76-годишниот Едгар, но дека ѝ се допаднал веднаш штом го видела. Се запознале откако Едгар го побарал нејзиниот телефонски број од заеднички пријател. „Делуваше како почитуван господин. На почетокот не мислев дека ќе завршиме во врска бидејќи е многу постар од мене. Но, беше привлечен. Моите чувства се развија по неколку месеци, а тој ми рече дека му се допаѓам од првиот ден кога се запознавме и дека сака да продолжиме да се гледаме“, открила таа.
Парот некое време се допишувал, а потоа заедно отпатувале на Хаваи, каде и официјално станале пар.
На почетокот била скептична за тоа како другите ќе реагираат, особено нејзиното семејство, со оглед на тоа дека никогаш претходно не била во врска со постар маж.
Нејзиното семејство, како што вели, не било воопшто среќно кога Дијана ги запознала со Едгар. Сепак, 25-годишната девојка вели дека престанала да се грижи за нивните мислења и тврди дека нејзината врска со Едгар е „најинтимната и најстрастната“ во која некогаш била.
„Некои членови на моето семејство не се согласуваат со тоа и мислат дека си го уништувам животот. Но, тоа не ме погаѓа премногу. Разбирам како нашата врска може да изгледа на прв поглед, но знам дека сум среќна“, раскажала таа.
Додала дека прво сакала да ја открие својата нова врска само на мајка си, но на крајот се одлучила да му каже на целото семејство. „Гледав по нивните изрази на лицето дека не се среќни – но мојата тетка ми даде целосна поддршка. Татко ми имаше слична реакција како другите: не можев целосно да разберам што мисли, но не беше пресреќен. За среќа, моите родители разбираат дека сум возрасна личност која сама донесува одлуки. Сè што сакаат е да бидам внимателна“, рекла таа.
Навела дека на нејзините пријатели им се допаднал Едгар, но биле изненадени кога им рекла дека се во врска.
Иако добила поддршка од некои блиски луѓе, Дијана се соочила со бројни негативни коментари на социјалните мрежи. Многумина ја нарекле нивната врска „вознемирувачка“ и „одвратна“, а Монтано добила и пораки како: „Твоите родители потфрлија“ и „Ова треба да биде нелегално“.
Парот очекувал негативни коментари и научиле како да се справуваат со нив на свој начин. Сепак, би сакале луѓето да не претпоставуваат веднаш најлошо.
„Коментарите знаат да бидат екстремни, но нè насмевнуваат. Добивме и многу позитивни зборови, луѓето нè прашуваат каде можат да најдат врска како нашата и дали Едгар има браќа. Што се однесува до нас, разликата во години не е фокусот на нашата врска. Да, очигледна е, и луѓето нè гледаат во јавноста. Но, со него сè е природно. Нашите разговори течат лесно, тој се однесува кон мене со почит и е полн со живот“, рекла таа, додавајќи:
„Тоа е едноставно многу возбудлива, страсна и среќна динамика. Едгар го извлекува најдоброто од мене, а и јас од него.“
И покрај сите негативни коментари, парот ужива во секој момент што го поминуваат заедно и се надеваат дека нивната љубовна приказна ќе ги инспирира другите и ќе помогне во разбивањето на стереотипите.
„Ова е многу здрава врска, што е тешко да се најде во моите години бидејќи има многу токсични луѓе. Можам да ја задржам својата слобода и да го живеам животот онака како што сакам. Се чувствувам послободна да бидам вистинската јас. Но, ако некој е инспириран од нашата врска и сака врска со голема разлика во години, треба да знае дека таквите врски можат да бидат предизвик. Јас имав среќа што го запознав Едгар и што тој е неверојатен кон мене, но тоа не е секогаш случај. Луѓето секогаш треба да внимаваат на однесувањето на нивните партнери бидејќи ризикот од емоционално, физичко и финансиско малтретирање може да се зголеми со возраста на партнерот“, истакнала Дијана.
