Патувањето со возот „Royal Scotsman“ носи спој на удобност, природа и велнес, а од неодамна и специфичен додаток. Имено, спа-вагонот во соработка со „Dior“ е резервиран за оние што сакаат нешто посебно.
Овој проект нуди поинаков вид велнес искуство, сместено во движење, низ природните убавини.
„Royal Scotsman“ веќе со години е познат како луксузен воз со винтиџ атмосфера, а спа-вагонот „Dior Spa“, претставен во 2023 година, додава нова димензија на релаксација и нега.
Ретритот во возот комбинира познати велнес третмани со програма што вклучува физички активности, релаксација и уживање во здрава храна.
Патувањето започнува од Единбург, со елегантен ентериер на вагоните во кој традиционалните детали се спојуваат со модерните дизајнерски елементи на „Dior“, особено во спа-делот.
Првиот ден возот патува покрај брегот, а вечерата е осмислена во соработка со нутриционист и готвач, со акцент на балансирана исхрана.
Следните два дена се резервирани за велнес активности: пилатес под водство на тренерка од „Dior“, работилници за дишење и нутриционистички совети се дел од програмата, како и излети до колонија на фоки, планинарење или дури и капење во ладните езера.
Посебен дел од искуството е и „forest bathing“ на имотот „Rothiemurchus“, што нуди мир и поврзаност со природата.
