Во големата анкета на германскиот туристички портал „Travelbook“ во која гласале над 13.000 луѓе на Инстаграм и Фејсбук, победник е Закинтос.

Овој остров во Јонското море ги престигнал и егзотичните дестинации како Бора Бора и островот Праслин на Сејшели. И тоа со причина: Закинтос нуди сѐ што срцето ви бара, од нереално сините лагуни до драматични карпи и заливи кои изгледаат како сцени од авантуристичките филмови.

Плажа „бродолом“ која остава без здив

Најпознатата разгледница од Закинтос е секако популарната Навагио плажа, место каде се наоѓа остаток од криумчарски брод, тиркизното море и карпите кои го одземаат здивот.

До неа може да се стигне со брод, а погледот од карпите се смета за еден од најфотогеничните на светот.

Повеќе од плажа: Пештери, видиковци и желки

Закинтос има авантуристички дух, нуди Сина пештера, рај за нуркање, веслање и истражување. Семејството ќе ужива во плажите Циливи и Аликес, а љубителите на природата можат да ги истражуваат и планинските патеки низ боровите шуми и шармантните села како што се Бочали, Кери...

Посебна атракција е желката „caretta-caretta“ која секоја година доаѓа на островот да положи јајца, особено во заливот Лаганас. Поради нив се воведени строги еколошки мерки, плажите се затвораат преку ноќ, а чамците мора да забават.

Љубезни домаќини и вечера под ѕвездите

Шармот на Закинтос го надополнуваат и луѓето, тие се многу гостопримливи, а таму има и ресторани со домашна храна под ведро небо и опуштена атмосфера на секој чекор.

Најдобар начин да го запознаете е изнајмување на автомобил или скутер затоа што автобусите не одат до сите заливи.