Доктор Саураб Сети, гастроентеролог од Харвард и водечки експерт за цревата, откри изненадувачка листа на навидум здрави намирници што треба да се избегнуваат за да се заштити здравјето на цревата и да се спречи воспаление, пишува „Дејли мејл“.
Д-р Сети предупреди дека луѓето консумираат „скриена“ ултра-преработена храна, конзерванси и засладувачи во разни закуски и преливи за салати. Тој рече дека се залажуваат од производи што изгледаат како здрави опции, но можеби не се.
Меѓу најлошите „престапници“ се гранолата, овошните јогурти и гумите за џвакање без шеќер, кои сите често се продаваат како здрави опции, но всушност можат да придонесат за воспаление и лошо здравје на цревата. Енергетските плочки се исто така на неговата црна листа.
„Тоа се всушност слатки полни со емулгатори, лажни влакна и масла од семки“, рекол тој во објавата на Инстаграм.
Емулгаторите, кои обично се користат за зголемување на волумен и конзервирање на преработена храна како јогурт и житарки за појадок, можат да ја променат структурата на слузницата на цревата. Кога овие адитиви ќе влезат во дигестивниот систем, тие формираат грутки слични на гел кои можат да го попречат варењето и да ја нарушат рамнотежата на микробите во цревата. Се претпоставува дека ова може да го попречува природното раздвојување на масниот слој и слојот на водата во цревата, со што го зголемува ризикот од бактериски инфекции.
Наместо да посегне по практична, но високо преработена ужина, овој доктор се одлучува за грст јаткасти плодови или овошје со путер од јаткасти плодови. Имено, јаткастите плодови содржат протеини и омега-3 масти и се природно богати со растителни влакна, што е поврзано со помал ризик од срцеви болести, мозочен удар, дијабетес тип 2 и рак на дебелото црево. Овие влакна, исто така, помагаат во спречување на запекот, помагаат во варењето и го продолжуваат чувството на ситост.
Чинија овесни снегулки, јогурт…
Овошните јогурти и оние со различни вкусови, кои изгледаат здрави, се исто толку лоши. Д-р Сети рекол дека тие често се полни со додадени шеќери и вештачки ароми. Тој, исто така, открил: „Гранолата со додадени шеќери е често полоша од десертот“.
Наместо тоа, гастроентерологот препорачува да се започне денот со чинија овесни снегулки или обичен јогурт со бобинки и чија семе. Бобинките, како боровинките и чија семето, се полни со антиоксиданти кои можат да му помогнат на телото во борбата против слободните радикали кои се поврзани со болести како дијабетес и рак.
Д-р Сети истакнал дека треба да бидете претпазливи со грицки и зачини кои се продаваат како „без шеќер“ или „здрави“.
„Гумата за џвакање без шеќер содржи вештачки засладувачи како сорбитол кои можат да предизвикаат гасови, надуеност и дијареја (пролив)“, рекол тој.
Наместо тоа, д-р Сети препорачува по оброкот џвакање семки од анасон, кои се природно богати со железо, цинк и калциум, за да се помогне во варењето и да се освежи здивот.
На листата на намирници што треба да се избегнуваат се и однапред подготвените преливи за салата.
„Дури и ‘здравите’ преливи за салата купени од продавница често се полни со масла што предизвикуваат воспаленија и додадени шеќери. Подобро е сами да направите свеж прелив од маслиново масло, лимон, сенф и зачински билки“, рекол докторот.
Рафинираните масла од семки како што се маслото од канола, соја или пченка се исто така знак за аларм за д-р Сети, бидејќи имаат висок процент на омега-6 масти. Некои тврдат дека може да биде исто толку лошо, или дури и полошо за срцето, како традиционалните животински масти како што се путер и говедска или свинска маст.
„Обидете се да готвите со масло од авокадо, екстра девствено маслиново масло или со кокосово масло за да одржите здрава цревна слузница и да спречите воспаление“, препорачал експертот.
Д-р Сети, исто така, препорачува намалување на консумирањето на млеко, а со тоа и на млечниот шеќер лактоза, што може да предизвика дигестивни проблеми кај луѓе со интолеранција.
„Лактозата може да биде иритантна за чувствителните црева и да предизвика надуеност или непријатност. Наместо тоа, обидете се со обично кафе или додадете цимет и бадемово млеко“, објасни тој.
На крајот, д-р Сети предупреди дека инстант тестенините можат да му наштетат на здравјето на цревата.
„Тие имаат висок процент на конзерванси, ниска хранлива вредност и се ужасни за цревните микроби. Најдобро е врз оризовите тестенини со зеленчук да се прелие супа“, рекол тој.
Порано влегување во пубертет
Предупредувањето од експертите доаѓа откако ново истражување откри дека децата кои јадат храна полна со засладувачи може да бидат изложени на поголем ризик од порано влегување во пубертет. Засладувачите кои обично се наоѓаат во диеталните газирани пијалаци и гумите за џвакање како алтернативи на шеќер се поврзани со одредени видови рак и срцеви проблеми.
