„Trump Mobile“, мобилниот оператор и производител на телефони што го основа "Trump Organization", веќе не тврди на својата веб-страница дека нивниот нов паметен телефон ќе биде произведен во САД.
Околу 22 јуни, компанијата ја промени формулацијата на својата страница и ја отстрани изјавата дека уредот е „Made in USA“, според архивирани снимки зачувани од "Internet Archive". Од 25 јуни, на сајтот стои дека телефонот „T1 8002“ е „дизајниран во согласност со американските вредности“. Претходно експлицитно пишуваше дека телефонот е „произведен во САД“, што го потврдуваат и скриншотови објавени од "CNN" претходно во јуни. Прва за промената извести редакцијата на "The Verge".
Оваа измена уследи откако индустриски аналитичари изразија сомнеж во американското потекло на телефонот, укажувајќи дека техничките спецификации потсетуваат на модел што го произведува кинески производител.
И покрај променетата формулација на веб-страницата, портпарол на "Trump Mobile" изјави за "CNN" дека „T1 телефоните со гордост се произведуваат во Америка“.
„Шпекулациите што го тврдат спротивното едноставно не се точни“, се наведува во соопштението.
Сепак, соопштението за јавност објавено минатата недела од "Trump Organization" сè уште наведува дека златниот телефон со цена од 499 долари ќе биде „дизајниран и произведен во САД“.
За време на официјалното претставување во "Trump Tower" на 16 јуни, партнерот на "Trump Mobile", Пат О’Брајан, изјави: „Ќе правиме телефони што ќе ги произведуваме во Америка.“ Подоцна, Ерик Трамп во интервју за конзервативниот медиумски коментатор Бени Џонсон рече: „На крајот, сите телефони ќе може да се произведуваат во САД.“
Рајан Рајт, потпретседател на одделот за уреди во истражувачката фирма "IDC", претходно изјави дека термините „дизајнирано“ и „произведено“ се мошне нејасни и не значат нужно дека уредите се целосно произведени во САД. На пример, "Apple" ги дизајнира своите телефони во Калифорнија, но ги склопува во Кина и Индија, користејќи компоненти од целиот свет.
На веб-страницата на "Trump Mobile" сè уште стои дека телефонот е „оживеан токму овде во САД“.
„Не постои ниту еден телефон кој е целосно, од почеток до крај, произведен во САД", изјави Рајт минатата недела.
Исто така, променети се и некои спецификации на "T1 8002". Додека првично беше наведено дека има екран од 6,78 инчи, сега стои дека дијагоналата изнесува 6,25 инчи — што е значителна разлика, споредлива со разликата меѓу "iPhone 16" и "iPhone 16 Pro Max". Ретко која технолошка компанија менува основни технички карактеристики на уред по објава.
Покрај тоа, веќе не е наведена ни големината на меморијата на уредот — клучен елемент за перформансите и работата на апликации.
Тод Вивер, директор на компанијата "Purism" (една од ретките што навистина произведува телефони во САД), и аналитичарот Макс Вајнбах од "Creative Strategies", претходно за "CNN" изјавија дека најавениот "T1" всушност изгледа како препакувана верзија на веќе постоечкиот "Revvl 7 Pro 5G" телефон. Тој уред го произведува кинеската компанија "Wingtech" и се продава по цена од околу 169 долари на "Amazon".
Лансирањето на "Trump Mobile" доаѓа во момент кога поранешниот претседател Доналд Трамп, кој не е директно вклучен во секојдневното работење на "Trump Organization", врши притисок врз технолошките гиганти како "Apple" и "Samsung" да ги произведуваат своите уреди во САД. Овој напор е дел од поширока кампања за враќање на производствените работни места во Америка. Сепак, експертите предупредуваат дека масовно производство на телефони на домашно тло е исклучително тешко — ако не и невозможно — особено во краток рок до септември.
„Освен ако семејството Трамп во тајност не развивало сопствена фабрика со целосна домашна продукција со години, што е малку веројатно, едноставно не е можно да ги исполнат дадените ветувања", рече Вивер претходно.
