Деновиве, поради нестабилното време, нашите клима уреди сè уште се наместени на греење, но наскоро веројатно ќе нѝ биде потребно ладење.

Како што летата стануваат потопли, уредите за ладење ќе работат сè повеќе и повеќе, а со тоа и нашите сметки ќе бидат сè повисоки.

Опцијата „fan“ (вентилатор) честопати ги збунува корисниците бидејќи клима уредот тогаш не го лади просторот, но сепак прави нешто. Имено тогаш работи само вентилаторот на уредот, но компресорот не работи.

Ова значи дека уредот нема активно да го лади или суши воздухот, туку воздухот ќе циркулира низ просторијата. Во тој момент, ниту температурата ниту влажноста на воздухот во просторијата не се менуваат, туку воздухот е рамномерно распределен низ целата просторија.

Овој режим има своја намена и доколку се користи мудро, може да помогне значително да се намали потрошувачката на електрична енергија, пренесе Telegram.hr.

На пример, ако просторот е претходно изладен во режим на ладење, а ние само сакаме да ја одржиме циркулацијата, режимот на вентилатор е одлична опција. Во овој режим, клима уредот троши минимална електрична енергија – десетици, а не илјадници вати – бидејќи нема големо оптоварување како при ладење или греење. Потрошувачката е приближно споредлива со помоќен куќен вентилатор.

Важно е да се нагласи дека во овој режим клима уредот нема да ја намали температурата ниту ќе ја отстрани влагата од воздухот. Опцијата вентилатор кај клима уредите всушност е слична на класичниот вентилатор бидејќи создава чувство на свежина поради протокот на воздух, но вистинската температура останува речиси иста.

Кога е најдобро да се користи „вентилатор“ на клима уредот?

Оваа опција е корисна во неколку секојдневни ситуации:

Наутро и навечер, кога надворешната температура е пријатна и не е потребно активно ладење.

Пролетни и есенски денови, кога е потребна свежина без прекумерна потрошувачка на електрична енергија.

Ноќе, кога е потребен циркулирачки воздух, без дополнително ладење што може премногу да го излади просторот или да ја зголеми сметката за електрична енергија.

За подобрување на квалитетот на воздухот – вентилаторот го пропушта воздухот низ филтрите на климата, со што се отстрануваат честичките прашина и алергените.

По ладењето, за сушење на внатрешните компоненти и спречување на формирање на мувла и непријатни мириси.

Меѓутоа, во влажни денови, опцијата вентилатор не се препорачува. Имено, ова значи дека воздухот само ќе циркулира низ просторот, но нема да ја исуши влагата. За да се избегне тоа чувството на задушливост подобро е да се користи опцијата „dry“ (суво).

Што значи брзината на вентилаторот на клима уредот?

Повеќето клима уреди им овозможуваат на корисниците сами да ја изберат брзината на вентилаторот – ниска, средна, висока или автоматска. Оваа поставка одредува колку брзо воздухот излегува од внатрешната единица. Поголема брзина значи посилен проток на воздух, побрза циркулација и побрзо ладење на просторот (доколку компресорот е вклучен), додека помала брзина значи потивко работење и подобра контрола на влажноста.

Еве како брзината на вентилаторот влијае на климата во просторијата:

Големата брзина брзо го распрснува воздухот и го лади просторот порамномерно, но може да биде побучна.

Помалата брзина е погодна за ноќна употреба, бидејќи е потивка и може поефикасно да ја отстрани влагата ако е вклучен режимот „ладење“ или „суво“.

Автоматскиот режим му овозможува на клима уредот да ја приспособи својата брзина според условите во просторијата.

Во пракса, добро е да се користи поголема брзина кога треба брзо да се излади просторот, а помала брзина за да се одржи температурата и да нема голема бучава.

Колку електрична енергија троши вентилаторот на клима уредот?

Во споредба со ладењето или греењето, потрошувачката во овој режим е занемарлива. Додека клима уредот во режим на ладење може да троши помеѓу 1000 и 3000 W, во режим на вентилатор потрошувачката често останува под 100 W. Ова значи дека клима уредот може да се користи во овој режим подолго време без да се грижите за сметката за електрична енергија.

Брзината на вентилаторот само малку ја зголемува потрошувачката – разликата помеѓу поголемата и помалата брзина е обично помала од 10 W, што е речиси незабележливо при домашна употреба.

Добра идеја е да ја вклучите опцијата вентилатор кога не е потребно дополнително ладење, бидејќи тоа ќе ја одржи достигнатата температура без дополнителна потрошувачка на електрична енергија. Покрај тоа, вклучувањето на овој режим околу половина час по ладењето им овозможува на внатрешните делови на уредот да се исушат, што спречува појава на непријатни мириси и развој на мувла.

Исто така, подолгото време на работа на вентилаторот поттикнува дополнителна филтрација на воздухот, што е корисно во простории со присуство на алергени или прашина. Од друга страна, вентилаторот овозможува и подобар проток на оладениот воздух кон подалечните делови од просторијата, со што се зголемува општото ниво на удобност.

Конечно режимот на вентилатор е корисен и за самиот уред, бидејќи го намалува оптоварувањето на компресорот и може да го спречи оштетувањето на уредот.