Д-р Бисерка Обрадовиќ во емисијата „150 минути“ на српска „Прва“ открила како лесно можете да ја надминете промената на времето.

„Пролетниот замор е состојба. Меѓутоа, сега имаме комбинација од пролетен замор и нагли промени на времето. Деновиве, повеќето од нас се чувствуваат ненаспани, со вртоглавица, главоболки, несвестици, едноставно – уморни. Наместо да бидеме во добро расположение бидејќи дојде доброто време, ние сме летаргични, дефокусирани, нервозни, безволни. Тоа се сите симптоми на наглото доаѓање на пролетта“, открила д-р Обрадовиќ и додала дека пролетниот замор е состојба која настанала како последица на зимскиот начин на живот.

„Во текот на зимата главно се храневме со јаглени хидрати. Слабо внесувавме витамини Ц и Д, но и Б, кој и те како е одговорен за пролетниот умор. Покрај тоа, повеќето од моите пријатели се жалат дека користеле само една третина од зимницата, дека мора да фрлаат кисела зелка, кисели краставички, а тоа се нашите извори на витамин Ц. Значи, едноставно, луѓето го преспале зимското време. Поради недостиг на светлина, повеќе се лачи хормонот мелатонин, а помалку серотонин и допамин, хормоните на среќата и наместо шест часа, луѓето спиеле по дванаесет“, објаснила докторката.

Може да дојде до колапс

На сите ни треба време за да се навикнеме на пролетта, изјавила д-р Обрадовиќ и додала дека алергиите ја отежнуваат ситуацијата. „Ненадејното цветање на многу растенија создава компликации. Се појави поленот. Потоа доаѓа до нагли временски промени, а нашиот организам се бори против вишокот топлина, така што се шират крвните садови, притисокот паѓа, а тоа предизвикува главоболка, вртоглавица и несвестица. Не треба да нè чуди што кај многумина доаѓа и до колапс. Затоа мораме на адекватен начин да се бориме против пролетниот замор“, рекла д-р Обрадовиќ и открила што помага: „Пролетниот замор трае четири недели. Ќе го намалите тој период со користење на витамин Д. Бидете на сонце 15 минути без заштита бидејќи сега УВ зраците не се силни, а сонцето придонесува за производство на витамин Д. Внесувајте што е можно повеќе витамини и минерали преку овошјето и зеленчукот. Во текот на зимата сè помалку внесувавме течности. Сега, треба да внесуваме минимум 2 литри течност. Потоа, битна е редовната физичка активност која не може да ја замени ниту еден лек, а знаеме дека физичката активност може да замени многу лекови“, советувала д-р Бисерка Обрадовиќ.